JI dáýirinde muǵalimniń róli ózgeredi — Astana IT University rektory
ASTANA. KAZINFORM — Jasandy ıntellektiniń qarqyndy damýy bilim berý júıesine de áser etip jatyr. Bolashaqta muǵalimderdiń basty mindeti aqparat jetkizý emes, oqýshy men stýdentti yntalandyrý bolmaq. Bul týraly Astana IT University rektory Áltaıyr Ahmetov Jibek Joly arnasynyń «Búgin LIVE» baǵdarlamasynda aıtty.
Onyń sózinshe, búginde kez kelgen aqparat ınternette jáne jasandy ıntellekt júıelerinde qoljetimdi. Sondyqtan bilim berý salasyndaǵy dástúrli tásilder ózgerip keledi.
— Pedagogıkalyq paradıgma ózgerip jatyr. Eger jasandy ıntellektini bilim berý protsesinde keńinen paıdalanatyn bolsaq, muǵalimder oqýshylarǵa shabyt beretin, olardy qyzyqtyratyn mamanǵa aınalýy kerek. Buǵan deıin oqytýshylar úıretip kelgen aqparattyń basym bóligi qazirdiń ózinde tsıfrlyq ortada bar, — dedi rektor.
Áltaıyr Ahmetovtiń aıtýynsha, endigi jerde oqytýshynyń basty qundylyǵy aqparatty jetkizýde emes, stýdenttiń pánge qyzyǵýshylyǵyn oıatyp, onyń oılaý qabiletin damytýda bolmaq.
Sondaı-aq ol jasandy ıntellekt stýdentterdiń bilim alý protsesin jeńildetetinin atap ótti. Máselen, dıplom jumysyn qorǵaýǵa nemese emtıhanǵa daıyndalý kezinde stýdentter jasandy ıntellekt arqyly ózderine qoıylýy múmkin suraqtardy aldyn ala anyqtap, jaýaptaryn taldaı alady.
— Stýdentter jasandy ıntellektiden óz jumysyn synap kórýdi, álsiz tustaryn kórsetýdi suraı alady. Bul olardyń emtıhan men dıplom qorǵaýǵa sapalyraq daıyndalýyna múmkindik beredi, — dedi ol.
Rektordyń pikirinshe, jasandy ıntellekt adamdardyń keıbir daǵdylaryna áser etýi múmkin. Dese de bilim berý uıymdarynyń mańyzy joıylmaıdy. Kerisinshe, muǵalimderdiń qoǵamdaǵy róli jańa mazmunǵa ıe bolady.
— Endi muǵalim tek bilim berýshi emes, baǵyt-baǵdar kórsetetin, motıvatsııa beretin tulǵa bolýy kerek, — dep túıindedi Áltaıyr Ahmetov.
Aıta keteıik, JI Ulybrıtanııa sotynda alǵash ret isti jeńýge kómektesti.
