JI dáýirinde gýmanıtarlyq baǵytty kúsheıtý kerek — Aımaǵambetov

— Eski model qandaı edi? Oqytýshy bilim beredi, stýdent ony emtıhanda dáleldeıdi, dıplom alady, jumysqa turady. Endi, bul logıka úzildi. Búgin stýdent JI-diń kómegimen úsh mınýttyń ishinde kez kelgen dıplomdyq jumystan artyq bıznes-jospar nemese taldaý jasap alady. Endigi qundylyq — JI-diń qolynan kelmeıtin árekette, ıaǵnı taza adamı quzyrettilikterde. Sondyqtan bizdiń bir qaraǵanda oǵash kórinetin tujyrymym mynandaı: JI dáýirinde ýnıversıtet naqty mamandyqtarǵa qamalyp qalmaı, irgeli jáne gýmanıtarlyq baǵytty kúrt kúsheıtýi kerek - «Fılosofııa», «Sotsıologııa», «Tilder», «Logıka», «Etıka».

Ashyǵyn aıtqanda, biz bul pánderge «ballast» retinde qaraýǵa úırenip qalǵanbyz. Joǵary oqý oryndary profıldik saǵattardy kóbeıtý úshin osy pánderdi qysqartyp jatyr. Bul — strategııalyq qatelik! Qarańyzdar, buryn baǵdarlamalaý úshin Python tilin bilý kerek bolsa, búgin «vaıb-kodıng» zamany keldi. Siz maqsatty qarapaıym tilmen sıpattap beresiz, al JI daıyn kodty ózi jazyp beredi. Sondyqtan endi sapaly prompt jazý úshin máseleniń mánin túsiný, kontekst pen onyń saldaryn kóre bilý qajet, — dedi Ashat Aımaǵambetov.

Onyń paıymynsha, buǵan tek irgeli gýmanıtarlyq bilim ǵana úıretedi. JI kompanııalarynyń osyndaı gýmanıtarlyq bilimi myqty mamandardy kóptep jaldaýy da tegin emes: olar suraq qoıa biledi, synı turǵydan oılaıdy jáne máselege keńinen qaraıdy.

— Qazirgi ýnıversıtettiń endigi basty mindeti — tek jumysqa daıyndaý emes. Ol mamandyqtar tez aýysatyn, kóp dúnıe avtomattandyrylǵan álemde ómir súrýge daıyndaýy tıis. Adam óz betinshe oılaný, qaıta oqý jáne ómirdiń mánin taba bilý qabiletin saqtap qalýy tıis, — dedi depýtat.

Budan buryn habarlanǵandaı, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin.