JI dáýirinde derekter ınfraqurylymyn ınvestıtsııalaý mańyzdy — Sarapshy
ASTANA. KAZINFORM — Jasandy ıntellekt salasynda álemdik kóshbasshylyqqa umtylǵan elder eń aldymen derekter ınfraqurylymyn damytýǵa basymdyq berýi kerek. Bul týraly «EY» kompanııasynyń memlekettik sektor jáne ınfraqurylym jónindegi JI baǵyty boıynsha jahandyq dırektor orynbasary Tomas Ervın aıtty.
Sarapshynyń pikirinshe, Qazaqstan tabıǵı resýrstarǵa baı memleket retinde jahandyq ózgerister kezeńinde ózine tıimdi strategııalyq ustanym qalyptastyra alady.
— Bolashaqqa kóz júgirtsek, Qazaqstannyń álemdik kúsh ortalyqtarynyń arasynda ózindik ornyn qalyptastyrýǵa múmkindigi bar. Mundaı jaǵdaıda beıtarap ustanymdy saqtaı otyryp, derekter ınfraqurylymyna ınvestıtsııa salý — eń utymdy ári qaýipsiz sheshimderdiń biri, — dedi Tomas Ervın Astanada QR Prezıdenti janyndaǵy Sheteldik ınvestorlar keńesiniń 38-otyrysy kýlýarynda.
Onyń aıtýynsha, aldaǵy jyldary JI tek ıntellektýaldyq eńbekti emes, óndiristik jáne fızıkalyq protsesterdi de túbegeıli ózgertedi.
— Jasandy ıntellekt bolashaqta ekonomıkanyń barlyq salasyna yqpal etetin negizgi faktorǵa aınalady. Sondyqtan búginnen bastap durys daıyndalǵan memleketter ózderiniń uzaq merzimdi damýyna berik negiz qalaıdy, — dedi ol.
Spıker tsıfrlyq ınfraqurylym JI-di damytýdaǵy sheshýshi faktor ekenin erekshe atap ótti.
— JI úshin joǵary esepteý qýaty, aýqymdy data, derekterdi óńdeý ortalyqtary, saqtaý júıeleri jáne senimdi baılanys jelileri qajet. Osyndaı ınfraqurylym bolmasa, halyqaralyq deńgeıde jumys isteý, álemdik standarttarǵa saı qaýipsiz tsıfrlyq orta qalyptastyrý jáne turaqty quqyqtyq retteýdi qamtamasyz etý múmkin emes, — dedi sheteldik sarapshy.
Tomas Ervınniń aıtýynsha, aldaǵy bes jylda ınvestıtsııalyq sheshimderdiń basym bóligi JI-diń damý deńgeıine qaraı qabyldanady.
— Bolashaqta qomaqty qarjy salatyn kez kelgen ınvestor kompanııanyń JI-di qoldanýǵa qanshalyqty daıyn ekenine nazar aýdarady. Eger men ınvestıtsııa salatyn bolsam, kompanııanyń jańa tehnologııalarǵa beıimdelip, olardyń múmkindigin tıimdi paıdalana alatynyna kóz jetkizer edim, — dedi ol.
Sóz sońynda ol JI-di damytýda tsıfrlyq egemendik máselesine erekshe nazar aýdarý qajettigin aıtty.
— Búginde kez kelgen memleket úshin eń mańyzdy máselelerdiń biri — derekter egemendigi. ıAǵnı derekterdiń elge qalaı kirip, qalaı shyǵarylatynyn jáne olardyń qanshalyqty qaýipsiz qorǵalatynyn naqty aıqyndaý qajet. Bul máselede neǵurlym túsinikti ári senimdi saıasat qalyptassa, ınvestorlardyń da senimi soǵurlym joǵary bolady. Derekterin Qazaqstanda saqtaǵysy keletin kompanııalar olardyń qaýipsiz saqtalatynyna jáne halyqaralyq talaptarǵa saı qorǵalatynyna tolyq senimdi bolýy tıis, — dedi EY sarapshysy.
Aıta keteıik, elordada QR Prezıdenti janyndaǵy Sheteldik ınvestorlar keńesiniń 38-otyrysy ótip jatyr.
