Jibek jolyn Batýmı arqyly damytýǵa bolady - Nazarbaev
ASTANA. QazAqparat - Búgin QR Prezıdenti Nursultan Nazarbaev pen Grýzııa basshysy Georgıı Margvelashvılı Aqordada ótken kezdesýdiń nátıjesi boıynsha birlesken málimdeme jasady, dep xabarlaıdy QazAqparat tilshisi.
«Búginde «Bir beldeý - bir jol» bastamasy aıasynda Grýzııany da tranzıttik memleketke aınaldyrýǵa mol múmkindik bar. Jibek joly jobasy aıasynda ol da Qazaqstan sııaqty óziniń júk aınalymyn arttyra alady. Qazaqstan men Grýzııa arqyly Qara teńizge, odan ary qaraı Eýropaǵa jetýge bolady. Osy baǵyt asa mańyzdy. Sosyn munaı men gaz tasymaldaý salasynda Grýzııa arqyly ótetin qubyrlardyń orny bólek. Osy oraıda biz Batýmı teńiz porty men termınalyn paıdalaný jaıyn talqyladyq. Búginde ol jerde qazaqstandyq kompanııalar jumys isteýde. Biz osy saladaǵy problemalardy sheshýge ýaǵdalastyq. Eger eki eldiń mınıstrlikteri tarıf máselesin retteı alsa, onda osy baǵyt Qytaı úshin de, Qazaqstan úshin de tıimdi bolady. Sonyń arqasynda ortaq tranzıttik áleýetti kóterýge bolady», - dedi Nursultan Nazarbaev birlesken málimdemege arnalǵan baspasóz máslıxatynda.
Memleket basshysynyń aıtýynsha, shaǵyn jáne keńeıtilgen quramda ótken kezdesýler kezinde xalyqaralyq mańyzy bar basqa da máseleler talqylandy.
Óz kezeginde Grýzııa basshysy Georgıı Margvelashvılı alǵysyn bildirip, eki eldi ekonomıkalyq jaǵynan ǵana emes, mádenı jaǵynan da barynsha jaqyndastyrý qajettigin jetkizdi.
«Jalpy, búgingi sapar Qazaqstan men Grýzııa arasyndaǵy baılanystardy jańa deńgeıge kóteredi degen senim bar. Men de Nursultan Ábishulyn Grýzııaǵa shaqyrdym. Ol sapar da eki eldiń ekonomıkalaryn jaqyndastyryp, týrızm men mádenıetin damyta túsedi», - dep atap kórsetti Margvelashvılı.
