«Jibek Joly Juldyzy» megajobasyna Qazaqstan atynan Aıqyn Tólepbergen qatysady
ASTANA. QazAqparat - «Qazaqstan» Ulttyq arnasynda 30 qyrkúıekten bastalatyn «Jibek Joly Juldyzy» halyqaralyq mýzykalyq saıysyna 9 eldiń ánshileri qatyspaq. Qazaqstannyń namysyn atalǵan án saıysynda Aıqyn Tólepbergen qorǵaıdy, dep habarlaıdy «QazAqparat»HAA tilshisi.
«Ár memleketten bir oryndaýshy baq synaıdy, ıaǵnı 9 memleket qatysatyn bolsa, 9 ánshi án saıysyna qatysady. Bular jas oryndaýshylar emes, óz elderine tanymal, ataǵy shyqqan ónerpazdar. Nelikten biz ánshilerdi osylaı tańdadyq? Olar tanymal bolǵandyqtan, óz elderinde qazaq ánderin oryndap, óz elderinde joǵary deńgeıde nasıhattaı alady. Sondyqtan, dál osyǵan biz basa nazar aýdaryp, sol elderdiń ataqty ánshilerin shaqyrdyq. Qazaqstan tarapynan uzaq oılanyp, jan-jaqtan saraptap, Aıqyn Tólepbergendi shyǵaryp otyrmyz. Bizdiń elimizdiń atyn joǵary deńgeıde qorǵaıdy degen úmittemiz», - deıdi «Qazaqstan» RTRK» AQ-nyń basqarma tóraǵasy Erlan Qarın.
Eske sala ketsek, Erlan Qarın búgin OKQ-da ótken baspasóz máslıhaty barysynda «Qazaqstan» ulttyq arnasynda «Jibek Joly Juldyzy» atty jańa halyqaralyq megajoba bastalatynyn habarlaǵan bolatyn. Onyń aıtýynsha, Uly Jibek Jolynyń boıynda ornalasqan Qazaqstan, Qyrǵyzstan, Tájikstan, Ózbekstan, Túrkııa, Ázerbaıjan, Grýzııa, Reseı Federatsııasynyń: Tatarstan, Bashqurstan sııaqty elderiniń jaryq juldyzdary bir sahnada baq synasady. Televızııalyq shoý jobaǵa qatysýshy elderdiń reıtıngi joǵary telearnalarynda da kórsetiledi. Qazirdiń ózinde bul jobanyń aýdıtorııasy 100 mln. adamdy qamtıdy.
