Jibek joly tarıhynan syr shertetin «Uly Jibek joly» mobıldi qosymshasynyń tusaýy kesildi
ASTANA. QazAqparat - Búgin Ulttyq aspaptar murajaıynda «Ksell» kompanııasy «Uly Jibek joly» mobıldi qosymshasynyń tusaýkeserin ótkizdi. Qosymshany «Mobile Access Studio» kompanııasy ázirlep, materıaldar Karl Baıpaqovtyń basshylyǵyndaǵy QR Bilim jáne ǵylym mınıstrliginiń Á.H. Marǵulan atyndaǵy Arheologııa ınstıtýtymen usynyldy. Bul týraly kompanııanyń baspasóz qyzmetinen habarlandy.
«Biz óte baı tarıhy bar elde ómir súremiz. Qazirgi Qazaqstan aýmaǵynda ornalasqan kóptegen qalalardyń órkendeýi naqty osy Uly Jibek jolynda saýda qatynastary jandanǵan kezge keledi. Bul taqyrypqa júzdegen kitaptar men tarıhı zertteýler jazylǵan. Biraq qazirgi zamanda aqparatty alý men almasý tez júzege asyp, tarıhı eńbekterdi zertteýge ýaqyt qalmaı qalyp jatady. Sondyqtan biz Qazaqstan tarıhynyń qyzyqty faktilerimen qol jetimdi ári qolaıly túrde tanystyratyn mobıldi qosymshany ázirledik. Buǵan qosa, bizdiń qosymshamyz elimizdiń qonaqtaryna mádenı-tarıhı tanymal jerlerimen zamanýı ınterbelsendi túrde - smartfondar men planshetterdiń ekrandarynan tanysýǵa kómektesedi», - deıdi «Kcell» AQ bas atqarýshy dırektory Alı Agan.
«Uly Jibek joly» mobıldi qosymshasy Jibek jolynyń tarıhyn b.d.d. ІІ ǵasyrdan bastap, b.d. XV ǵasyrǵa deıin «áńgimelep» beredi. Endi smartfon paıdalanýshylary ózderi úshin kez kelgen yńǵaıly ýaqytta Shyǵys pen Batys arasynda kerýendik saýdanyń damý kezeńine tarıhı sapar jasaı alady. Mobıldi qosymsha Qazaqstan jáne Orta Azııa boıynsha saıahattap júrgen otandyq jáne sheteldik týrıstterge jáne de otandyq tarıhty zerttep júrgen barlyq qazaqstandyq mektep oqýshylaryna tamasha kómekshi bolady.
Qosymshanyń úsh tilde: qazaq, aǵylshyn jáne orys tilderindegi yńǵaıly ınterfeısi bar ári bul úsh dáýirge bólingen karta. Osy arqyly Uly Jibek jolynyń damýynyń negizgi kezeńderin ońaı zertteýge múmkindik bolady. Kartalarda barlyq eskertkishterdiń ornalasqan jerleri, jáne de kóne memleketterdiń shekaralary belgilengen. Ár kartada Google Map-qa baılanysty belgiler bar.
Barlyq tarıhı derekter, sonyń ishinde kartalar, tarıhı eskertkishterdi sıpattaıtyn mátinder, sýretter Á.Marǵulan atyndaǵy Arheologııa ınstıtýtynyń dırektory, tarıh ǵylymdary doktory Karl Baıpaqov basqaratyn otandyq arheologtar men kartograftar tobymen ázirlenip, usynyldy. Jalpy qosymsha Qazaqstan, Qytaı, Qyrǵyzstan jáne Eýropadaǵy birneshe qalanyń aýmaǵynda ornalasqan 45 tarıhı qurylys týraly áńgimeleıdi.
«Uly Jibek joly» mobıldi qosymshany smartfonǵa nemese planshetke Play Market nemese AppStore-da tegin kóshirip alýǵa bolady. Kóshirip alý úshin atalǵan «dúkenderdiń» izdeýishterine «Silk Road» degen mátindi engizý kerek.
