«Jibek joly» rallıine qatysýshylar Qazaqstannyń tabıǵatynyń ásemdigine tánti boldy
ALMATY. QazAqparat- «Jibek joly» rallıine qatysýshylar Qazaqstannyń qyzdary men tabıǵatynyń ásemdigine tánti bolysty.
Bul týraly búgin Almatyda ótken baspasóz máslıhaty barysynda ataqty jaryskerler Stefan Petransel, Sebastıan Leb jáne Sırıl Depre, sondaı-aq Peugeot Total komandasynyń dırektory Brýno Formın málimdedi.
«Jibek joly» rallıi - óte tanymal jarys. Óte kúrdeli jáne óte qyzyqty trassa. Biz jarys jolynyń úshten ekisin júrip óttik. Biraq, ókinishke qaraı, osydan eki kún buryn qatelikke boı aldyryp, aýyr apatqa ushyradyq. Avtokóligimizdi jóndeımiz dep kóshbasshylyq orynnan aıyrylyp qaldyq. Soǵan qaramastan, qalǵan eki mashınamyzdyń arqasynda kósh basyna shyqqymyz keledi. Beıjińge birinshi bolyp jetemiz degen úmittemiz", - dedi Stefan Petransel.
Óz kezeginde jarystyń kóshbasshysy Sırıl Depre Almatyda qanyp uıyqtaǵanyn aıtty.
«Uzaq ýaqyttiń ishinde birinshi ret kereýette uıyqtadym. Uıqym qandy. Keshe asyqpaı otyryp, keshki as ishtik. Aldymyzda áli aýyr trassa kútip tur. Komandalardyń barlyǵy birinshi oryndy jeńip alǵysy keledi. Biz úshin jaǵdaı ońaı emes. Osy jetken ornymyzdy saqtap, komandany jeńiske jeteleı bilý qajet», - dedi S. Depre.
Komandanyń taǵy bir múshesi Sebastıan Leb «Jibek jolynyń» «Dakar» jolyna qaraǵanda edáýir uzaq ekendigin aıtty.
«Jol-jónekeı Qazaqstannyń ásem jerlerin qarap, tánti bolyp jatyrmyz», - deıdi Sebastıan Leb.
Aıta ketelik, qurlyqaralyq «Jibek joly» marafony ótken 8 shilde kúni Máskeýdiń Qyzyl alańynda bastalǵan edi. Al, 11 shildede jarysqa qatysýshylar Qostanaı qalasyna keldi, kelesi kúni Astanada boldy.
Eki apta ishinde olar 10 myń shaqyrymnan astam aýmaqty basyp ótýge tıis. Al onyń basym bóligi shapshań júrýge arnalǵan jerler.
Bıyl «Jibek joly» rallıinde Peugeot Total komandasynyń úsh ekıpajy jarysýda. Olar: «Dakar» rallıiniń birneshe dúrkin chempıony Stefan Petransel men shtýrman Jan-Pol-Kottre, rallı-reıd boıynsha eki dúrkin álem chempıony, mototsıkl boıynsha «Dakar» rallıiniń bes márte chempıony Sırıl Depre men shtýrman Davıd Kastre jáne klassıkalyq rallı boıynsha álemniń bes dúrkin chempıony Sebastıan Leb pen shtýrman Danıel Elena.
