Jibek Joly qalalarynyń basshylary Astanada bas qosady
ASTANA. QazAqparat - 2-3 shilde kúnderi Astanada Jibek Joly qalalarynyń merleri bas qosatyn «Global Silk Road» forýmy ótedi, dep habarlaıdy QazAqparat tilshisi.
Bul bastamany Qazaqstan Respýblıkasynyń Prezıdenti Nursultan Nazarbaev 17 mamyrda ótken HІ Astana ekonomıkalyq forýmynyń plenarlyq otyrysynda málimdegen edi.
"Jibek Joly elderi - álem elderiniń saıası-ekonomıkalyq jáne týrıstik qyzyǵýshylyǵyn týǵyzatyn erekshe tabıǵı muraǵa ıe memleketter. Sondyqtan, osy forým Astanany álemniń saıası jáne mádenı ortalyǵy, ekonomıkanyń lokomotıvi retinde jarııalaýǵa, sheteldik ınvestorlar men týrıster úshin tartymdy qala retinde tanytýǵa múmkindik beredi. Forýmǵa Jibek Joly qalalarynyń merleri, álemdik bıznes jáne qarjylyq ınstıtýttar, memleket jáne ǵylym qaıratkerleri qatysady. Búgingi kúni álemniń 52 elinen 2250 qatysýshy, sheteldik spıkerler men saıası qaıratkerler keledi dep kútilýde", - dep málimdedi qalalyq Investıtsııalar jáne kásipkerlikti damytý basqarmasynyń basshysy Álisher Ábdiqadirov Ortalyq kommýnıkatsııalar qyzmetinde ótken baspasóz máslıhatynda.
Forýmda HHІ ǵasyrdaǵy Jibek Jolyn tsıfrlandyrýdyń mańyzdy máseleleri, turaqty damý, ekonomıkalyq teńsizdikti tómendetý, halyqaralyq saýdanyń jańa erejeleri, krıptovalıýtalardy paıdalaný, áıelder men jastardyń, úkimettik emes uıymdardyń mańyzdy máseleleri talqylanady.
"Forým sońynda Jibek Joly elderindegi qalalar basshylarynyń klýby qurylady dep kútilýde. Sondaı-aq, bıznes, ǵylym, ýnıversıtetter, BAQ, ádebıet pen óner, týrızm, sport baǵyttary boıynsha qaýymdastyqtar men birlestikter ashylady. Mektepke deıingi bilim berý, týrızm, sport boıynsha kommertsııalyq qujattarǵa qol qoıylady", - dep óz sózin tolyqtyrdy basqarma basshysy.
Forýmnyń basty sharalary Beıbitshilik jáne kelisim saraıynda ótedi, al bıznes-baǵdarlama men medıaaımaq Táýelsizdik saraıyna josparlanǵan.
Sondaı-aq, shara aıasynda Jibek joly elderiniń ardager fýtbolshylary men qala basshylary joldastyq kezdesý ótkizedi.
Forýmnyń qurmetti spıkerleri arasynda álemdegi eń jetildirilgen jasandy gınoıd Sofııa esimdi robot bar. Kelýshiler robotpen emin-erkin tildese alady. Odan bólek, forýmǵa Tatarstan Prezıdenti Rýstam Mınnıhanov, Global Bank of Memories bas dırektory Mark Gınzbýrg, «Laboratorııa Kasperskogo» kompanııasynyń teń quryltaıshysy Natalıa Kasperskoıa, burynǵy federaldyq kantsler Alfred Gýzenbaýer, Polshanyń burynǵy prezıdenti Aleksandr Kvasnevskıı, reseılik tanymal qoǵam qaıratkeri Irına Hakamada, Nobel syılyǵynyń laýreaty Rae Kvon Chýng qatysady.
