«Jibek joly» halyqaralyq festıvaline kórermender úlken qyzyǵýshylyq tanytyp otyr - T. Muhamedjanov
ASTANA. QazAqparat - «Jibek joly» halyqaralyq festıvaline jurtshylyq úlken qyzyǵýshylyq tanytyp otyr. Bul týraly búgin elordada ótken baspasóz máslıhatynda aıtyldy.
«Astana Opera» teatrynyń dırektory Tólegen Muhamedjanovtyń sózine qaraǵanda, teatr sahnasynda Qazaqstan, Italııa, Frantsııa, Qytaı, Reseı opera jáne balet juldyzdary óner kórsetedi.
«Keıbir spektaklderge qazirgi kezde bıletter joq. Adamdar qoıylymdarǵa úlken qyzyǵýshylyq tanytyp otyr. Festıvaldiń baǵdarlamasy óte qyzyq. Aldaǵy jyly osy mádenı sharaǵa qatysýshy ujymdardyń sany arta túsedi degen oıdamyn. Osy oraıda 2015 jyly budan basqa da memleketterden ártister keledi dep paıymdap otyrmyz»,-dedi ol.
T. Muhamedjanovtyń aıtýynsha, festıval aıasynda Bıbigúl Tólegenovanyń «Súıý, úmittený jáne sený» atty benefısi KSRO Halyq ártisiniń 85 jyldyq mereıtoıyna oraı 30 qyrkúıekke belgilenip otyr.
M. Tólebaevtyń «Birjan-Sara» operasy Qazaqstan jáne Reseı ártisteriniń qatysýymen 20 qyrkúıekte qoıylady.
Sonymen qatar Ulttyq Qytaı teatry 25 qyrkúıekte Qytaıdyń biregeı ulttyq mádenıetin, opera jáne balet ónerin kórsetip, halyq ánderi men bı qoıylymdarynan turatyn kontsert usynady.
Budan bólek, «Romeo men Djýletta» baletin 19 qyrkúıekte kórýge bolady. Romeo róline Roman Mıhalev (Frantsııa) shaqyrtylsa, Djýlettany Mádına Baspaeva somdaıdy.
«Spartak» baletin kórermen 23 qyrkúıekte tamashalaı alady. Bas partııany «Astana Opera» baletiniń solısi Adamjan Baqtııar, Frıgııany QR Eńbek sińirgen qaıratkeri Mádına Baspaeva oryndasa, Egına partııasyn Úlken teatrdyń prıma balerınasy Ekaterına Shıpýlına (Reseı), sondaı-aq Kras partııasyn Úlken tetatrdyń premeri Aleksandr Volchkov somdaıdy.
Aıta keteıik, «Astana Opera» alǵashqy «Jibek joly» halyqaralyq festıvalin ótkizedi. Astana turǵyndary men qonaqtary óner merekesin 17 qyrkúıek pen 6 qazan aralyǵynda tamashalaı alady.
