Jibek joly elderiniń «Din jáne órkenıet» jobasyn qolǵa alýy mańyzdy - Serikbaı qajy Oraz

NUR-SULTAN. QazAqparat - Jibek joly elderiniń Dinı basqarmalary arasynda «Din jáne órkenıet» jobasyn qolǵa alý mańyzdy. Bul týraly búgin elordada ótip jatqan "Rýhanı Jibek joly. Islam jáne jastar: qazirgi zamanǵy syn-qaterler" taqyrybyndaǵy IV halyqaralyq dinı-ǵylymı konferentsııa barysynda Qazaqstan musylmandary dinı basqarmasynyń tóraǵasy Serikbaı qajy Oraz aıtty, dep habarlaıdy QazAqparat tilshisi.

«Tarıhynan taǵlym alǵan, al tarıhı tulǵalardan tálim kórgen urpaq dini men dástúrin úılestirip, ónegeli ómir sabaqtastyǵyn qalyptastyrmaq. Bul bastama tarıshy ǵalymdar men din ǵulamalarynyń Jibek joly tarıhyn ǵıbrattyń kózimen qaıta zertteýin qajet etedi. Bul jumysty júıeli júzege asyrý úshin Jibek joly elderiniń Dinı basqarmalary arasynda «Din jáne órkenıet» jobasyn qolǵa alýdyń mańyzy úlken. Atalǵan jobalar men usynystardy talqylaý úshin arnaıy birlesken jumys tobyn qurýdy usynamyn», - dedi Serikbaı qajy Oraz.

Onyń atap ótýinshe, Uly Jibek jolynyń kóp bóligi Ortalyq Azııa men Qazaqstan jerinde ornalasýy halqymyzdyń mádenıetin, rýhanı murasyn baıyta tústi. Qazaq toptyraǵynda jazý, sáýlet, qol óneriniń damýyna oń áserin tıgizdi.

«Osynaý oń úderis baıyrǵy babalarymyzdyń ıntellektýaldy ómirine ózgeris ákeldi. Alysty jaqyn etip, Ortalyq Azııa men Eýropany baılanystyrǵan saýda jolynyń boıynda tarıhı meshitter men keseneler boı kóterdi. Otyryqshylyq mádenıet qalyptasty. Osy kezeńde paıda bolǵan Otyrar, qazirgi Túrkistan, Saýran, Saıram, Taraz syndy qalalar tek saýda joly bolyp qalmastan dúnıejúzi órkenıetin toǵystyryp, adamzat qoǵamynyń damýyna óshpes úles qosty», - dedi elimizdiń Bas múftıi.

Aıta keteıik, konferentsııa barysynda QMDB tóraǵasy Uly Jibek joly elderiniń rýhanı kartasyn jasaýdy usynǵan bolatyn.