Jibek joly boıynda Almaty, Shymkent jáne Aqtóbe aglomeratsııalary qurylady
Mundaı pikirdi Astana ekonomıkalyq forýmy aıasynda «Memqalaqurylyskadastry» MKK bas dırektory Turlybek Musabaev bildirdi, dep habarlaıdy QazAqparat.
Onyń atap ótýinshe, Qazaqstan Jibek joly boıynda Almaty, Shymkent jáne Aqtóbe aglomeratsııasyn qurýǵa nıetti.
«Jibek jolyndaǵy Almaty aglomeratsııa elimizdiń iri saýda-logıstıkalyq, qarjylyq jáne ınnovatsııalyq ortalyǵyna aınalady. Máselen, Almatyda mundaı ortalyq ekonomıkany ártaraptandyrý maqsatynda tehnologııalyq damýǵa baǵyttalǵan «Aqparattyq tehnologııalar parki» arnaıy ekonomıkalyq aýmaǵy men qalanyń Alataý aýdanyndaǵy ındýstrıaldy aımaq bolady», - dedi ol.
Onyń aıtýynsha, Shymkent óńiri elimizdiń ońtústik aımaǵyndaǵy ónerkásiptik jáne aýyl sharýashylyǵy ortalyǵy retinde damıtyn bolady. Bul rette maqta-mata buıymdaryna, kilemderge, qaǵaz shyǵarý isine basqa da jeńil ónerkásip túrlerine aıryqsha mán beriledi. Al Aqtóbede ınvestıtsııalyq aımaqtar, ındýstrııaldy-logıstıkalyq parkter ornalastyrylady. Olardyń basymdyqqa ıe qyzmetteri munaı men gazdy qaıta óńdeý, munaı-gaz mashınalaryn shyǵarý, hımııa ónerkásibi syndy salalar bolmaq.
«Atap ótken aımaqtar bıznes pen ınvestorlarǵa qajetti barlyq ınfraqurylymdardy usyna otyryp, baǵdarlanǵan óndiristik qýattardyń shoǵyrlanǵan ortasy retinde eldiń úsh ósim núktesine aınala alady. Bul keleshekte, 2050 jylǵa qaraı qazirgi 45 myń dollar kólemindegi eńbek ónimdiligin 120 myń dollarǵa deıin arttyrýǵa múmkindik beredi», - dedi Musabaev.