«Jibek joly» baıqaýynyń bas júldesi Aqtóbege buıyrdy
AQTÓBE. QazAqparat - Aqtóbede «Jibek joly» baıqaýy ótti. Baıqaý kezinde aqtóbelik jyrshy, termeshilerdiń ánderi oryndaldy, dep habarlaıdy QazAqparat tilshisi.
Aqtóbede alǵash ret jyrshy, termeshilerdiń ánderi estradalyq baǵytta oryndaly. Baıqaýǵa 15 ónerpaz qatysty. Olar Óskemen, Aqtaý, Almaty, Oral, Qyzylorda, Shymkent, Qaraǵandy qalalarynan keldi. Al Aqtóbeden 5 ónerpaz baǵyn synady. Jas ánshilerge baıqaý kezinde Aqtóbe óńirinde týyp-ósken aqyn-jyraýlardyń shyǵarmalaryn qaıta óńdep, jańa baǵytta oryndaý talaby qoıyldy.
«Qyzyl, Bataqtyń Sarysy, Naýryzbek, Áýbákir Kerderi, Shernııaz sal, Moldabaı, Bákir Tájibaevtyń sózderine jazylǵan ánderdiń negizin buzbaı, jastarǵa jetkizý kózdeldi. Qazir estradamyz da túsiniksiz kúı keship jatyr. Eýropaǵa elikteıdi, toı bıznesi de bar. Biraq dástúrimizdi dáripteýimiz kerek. Bul baıqaýǵa kez kelgen ánshi qatysa almaıdy. Jyr, termeni estaradaǵa ákelý, óńdeý qıyn. Ulttyq naqyshty saqtap, jańa ándi jetkizý talaby qoıyldy. Shetelge barǵan kezde de ulttyq ónerimizge mán beredi, suraıdy. Baıqaý kezinde Moldabaıdyń áni «Moldabaı», Qyzyldyń «Qamshyger» áni jaqsy óńdelip, jetkizildi», - dedi oblystyq fılarmonııa dırektory Elýbaı Kenjalıev.
Jeńimpazdardy Aqtóbe oblysynyń ákimi Berdibek Saparbaev quttyqtap, rýhanı jańǵyrý baǵytyndaǵy jumystardyń qolǵa alynǵanyn jetkizdi.
«Adamǵa kúsh, qaırat, jiger beretin ol - án, óner, ádebıet. Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy jarııalanǵan bolatyn. Maqaladaǵy baǵdarlamalardy júzege asyrý negizinde elimizdiń túkpir-túkpirinde mádenı sharalar júrip jatyr. Aqtóbede de óteýde. Respýblıkalyq «Jibek joly» baıqaýy da rýhanı jańǵyrýǵa arnaldy. Jibek jolynyń Qazaqstan úshin mańyzyn bilesizder. Jibek joly arqyly Qazaqstandy Eýropa men Azııa bildi»,- dedi Aqtóbe oblysynyń ákimi Berdibek Saparbaev.
Baıqaýdyń bas júldesin oblystyq fılarmonııa ánshisi Nurtas Omarov jeńip aldy. Ol Astana qalasynda bilim alyp, eńbek jolyn týǵan jerde jalǵastyrýdy jón kórgen.
«Ahmet Jubanov atyndaǵy mýkalyq kolledjiniń akademııalyq án salý mamandyǵy boıynsha bitirdim. Ustazym - Marat Áıtimov. Astanada qalasyndaǵy Qazaq ulttyq óner ýnıversıtetiniń akademııalyq vokal mamandyǵyn bitirdim. Baıqaýdyń negizgi talaby aqtóbelik jyrshy, termeshilerdiń ánderi, jyrlary aıtylýy tıis boldy. Men Moldabaıdyń «Moldabaı» ánin shyrqadym. Óńdeý kezinde dástúrden alshaqtamadyq, boıaýyn sol kúıi qaldyrdyq. Ándi Murat Kýletenov óńdedi»,- dedi «Jibek joly» baıqaýynyń bas júldegeri Nurtas Omarov. Aıta keteıik, bas júldege 500 myń teńge berildi. Al birinshi oryndy almatylyq ónerpaz Ábý Qazybek jeńip aldy. Gala kontsert kezinde Ómirqul Aınııazov, Aıgúl Qosanova, Erbolat Qudaıbergen, «Alash uly» toby óner kórsetti.
