«Jibek joly - 2017» rallı qatysýshylary astanalyqtarmen jarysty
Jol-jónekeı astanalyqtarmen de jarysyp kórdi, dep xabarlaıdy QazAqparat tilshisi.
Aıta ketken jón, "Jibek joly - 2017" rallı qatysýshylary ishinde Qazaqstannyń eki ekıpajy da bar. Olar - Aktau Motosport jáne Astana Motosport. Aqtaýlyqtar Kırıll Chernenkov men Alekseı Mýn jol talǵamaıtyn kólikpen júrse, astanalyq Artýr Ardavıchýs júk kólikteriniń jarysyna qatysýda.
Bıylǵy rallı 7 shilde kúni Máskeý qalasynda bastalǵan bolatyn. Astanadan keıin jarys qatysýshylary Semeı men Úrjar arqyly Qytaıǵa ótip ketedi. Al 22 shildede Sıan qalasynda jeńimpazdar anyqtalady. "Jibek joly - 2017" rallıine 35 eldiń 90 ekıpajy qatysýda. Olardyń quramynda 41 jol talǵamaıtyn kólik pen 21 júk kóligi bar. Jarysty 196 memlekette 55 iri buqaralyq aqparat quraldary kórsetip jatyr.
QR Mádenıet jáne sport mınıstri Arystanbek Muxamedıulynyń aıtýynsha, "Jibek joly - 2017" xalyqaralyq rallı jarysy arqyly Qazaqstannyń ımıdjin kóterýge zor múmkindik bar. Al atalǵan sharanyń EKSPO-2017 kórmesine tuspa-tus kelgeni jaıdan-jaı emes. "Sóz joq, bundaı jarystardyń arqasynda úsh memlekettiń arasyndaǵy baılanystar kúsheıe túsedi. Osy oraıda uıymdastyrýshylarǵa úlken alǵys aıtqymyz kelip otyr. Óıtkeni biz atalǵan jarys EKSPO-ǵa sáıkes kelse eken dep, ótinish aıtqanda olar bizdiń bastamamyzdy birden qoldady. Reseı de, Qytaı jaq ta jarys qatysýshylary Astana arqyly jazdyń tap ortasynda ótetindeı etip, baryn saldy. Osynyń ózi ózara qurmet pen syılastyqtyń kórinisi bolsa kerek. Sosyn bul rallıge búkil álem kóz tigip otyr. Endi, ol arqyly Qazaqstan keńinen tanylady dep senemiz", - deıdi Muxamedıuly. Mınıstr de búgin qarsy alý rásimine qatysyp, óz tilegin jetkizdi.
Aıta keteıik, "Jibek joly - 2017" xalyqaralyq rallıi uzaqtyǵy jaǵynan eń úlken báseke bolyp sanalady. Onyń uzyndyǵy - 9 599 shaqyrym.
