«Jibek joly - 2017» avtorallıiniń kezeńi Qazaqstannyń úsh oblysymen ótedi
PAVLODAR. QazAqparat - 40 eldiń qatysýshylary bar «Jibek joly - 2017. Máskeý-Astana-Sıan» halyqaralyq rallıiniń qazaqstandyq kezeńin úsh oblysta ótkizý josparlanýda, dep habarlaıdy «QazAqparat» HAA tilshisi.
12 shilde kúni rallı Pavlodarda «Ekibastuz - Baıanaýyl aýdany - Maı aýdany» marshrýty boıynsha ótedi. Bul týraly Pavlodar oblysy dene shynyqtyrý jáne sport basqarmasynan habarlady.
Jarys baǵyty topyraqty, dalaly jerlermen ótedi. Ereje boıynsha marshrýt aýyldyq jerlerdi aınalyp ótedi, degenmen, keı ýchaskelerde rallı asfalt joldardy kesip ótip, eldi mekenderge jaqyn bolady.
Halyqaralyq jarysqa álemniń úzdik avtoshabandozdary qatysady: 40 elden 150 jeńil jáne júk kóligi (jarysqa arnalǵan 80 djıp, jarysqa arnalǵan 30 júk kóligi, 30 «Baspasóz» halyqaralyq kóligi). Rallı qaýipsizdigin 6 tikushaq baqylaıdy.
Ertisten basqa, avtorallıdiń qazaqstandyq kezeńi Aqmola, Qaraǵandy oblystarynda da ótedi.
