Jibek joly -2016: Rallıge qatysýshylar Astanadaǵy jankúıerlerimen jolyǵady
ASTANA. QazAqparat - «Jibek joly - 2016» rallı jarysynyń úshinshi kezeńinde Aıdyn Raqymbaev pen Baýyrjan Isabaeva basqarǵan MINI avtomobılindegi Astana prezıdenttik klýbynyń ekıpajy altynshy bolyp máre syzyǵyn kesip ótti. Jarysqa qatysýshylar Búgin keshke Qostanaıdan Astanaǵa jetedi.
«Ýfa-Qostanaı .. 6-shy bolyp máre syzyǵyn kesip óttik! Eki márte baǵytymyzdan jańylyp qaldyq, bir ret joldan sekirip kettik, alaıda mashına shydas berdi! Erteń Astanaǵa bet alamyz, 750 km... Jarys kólikteri men jarysqa qatysýshylardy kórgisi keletinderdi keshke 20:30-dan keıin Báıterektiń janyna shaqyramyz, onda Dakardyń tanymal qatysýshylary bolady!», - dep jazdy 11 shildede Aıdyn Raqymbaev Feısbýktegi paraqshasynda.
Astana ákimi Áset Isekeshev qazaqstandyq sportshynyń jazbasyna pikir qaldyryp: «Sáttilik tileımin! Erteń Astanada jarysqa qatysýyshlardy qarsy alamyz!», dep jazdy.
Eske sala ketsek, «Jibek joly - 2016» rallıi Jibek joly baǵdarymen ótedi, ári Reseı, Qazaqstan, Qytaı elderiniń taýly, shóldi, dalaly jerlerindegi 10 myń shaqyrymnan astam jolymen júrip ótedi.
Qazaqstanda «Jibek joly - 2016» rallıi baǵdary 3000 shaqyrymǵa sozylyp jatyr, ol Qostanaı, Astana, Balqash, Almaty baǵytymen ótedi.
«Jibek joly - 2016» rallıiniń Qazaqstandaǵy marshrýty:
11 shilde, 3-shi kezeń: Ýfa - Qostanaı
12 shilde, 4-shi kezeń: Qostanaı - Astana
13 shilde, 5-shi kezeń: Astana - Balqash
14 shilde, 6-shi kezeń: Balqash - Almaty
15 shilde, Tynyǵatyn kún
16 shilde, 7-shi kezeń: Almaty - Bortala
