Jibek Qulymbetova djıý-djıtsýdan úsh dúrkin álem chempıony atandy
ALMATY. QazAqparat - BAÁ-niń Ábý-Dabı qalasynda 14 jastaǵy qazaqstandyq Jibek Qulymbetova djıý-djıtsýdan (ne-vaza) úsh dúrkin álem chempıony atandy, dep habarlaıdy QazAqparat tilshisi.
Ol 44 kelige deıingi salmaq dárejesinde synǵa tústi. Onyń qarsylastary BAÁ, Reseı, Taıland elderiniń ókilderi boldy. Barlyq aıqas tunshyqtyrý ádisimen erte aıaqtaldy.
«Búgin Ábý-Dabıde Qazaqstannyń Ánurany shyrqalyp, elimizdiń týy kóterildi. Tórt jekpe-jek ótkizip, barlyǵyn da tunshyqtyrý ádisimen jeńdim... Birinshi qarsylas BAÁ, ekinshisi Taıland, úshinshisi de BAÁ, tórtinshisi Reseı Federatsııasynan keldi. Dostar, barshańyzdyń jyly lebizderińizge rahmet, men sizderdiń qoldaýlaryńyzdyń arqasynda chempıondyq ataqty jeńip aldym», - dep jazdy jas chempıon óziniń Instagram paraqshasynda.
Qazaqstan Top Team akademııasynyń fılıaly bolyp tabylatyn Saǵadat Nurmaǵambetov atyndaǵy «Sagadat Batyr - QTT» klýbynyń tárbıelenýshisi de óziniń kýmıri, bapker Nursultan Orynbasarovqa qoldaý kórsetkeni úshin alǵysyn bildirdi.
Jas chempıon endi 14 qarashada Ábý-Dabıde bastalatyn «Abu-Dhabi World Jiu-Jitsu Championship-2021» týrnırine, sondaı-aq Máskeýde ótetin grepplıng básekesine qatysýdy josparlap otyr.
Buǵan deıin Jibek eki ret – 2018 jáne 2019 jyldary álem chempıony atandy.
Aıta keteıik, atalmysh chempıonatqa álemniń 30-dan astam elinen 14 jáne odan joǵary jastaǵy sportshylar qatysýda. Qazaqstannan Jibek Qulymbetovadan basqa taǵy birneshe sportshy júldeger atandy: Nuraı Altynbek altyn (40 kelige deıin), Raıymbek Erjan – qola (50 kelige deıin), Darına Jumash – kúmis (57 kelige deıin), Aınur Baıǵuja – kúmis (70 kelige deıin), Serikjan Maǵaz kúmis (94 kelige deıin) oljalady.
