JI azamattyń ótinishin qaı memlekettik organ qaraýy keregin anyqtaıdy
ASTANA. KAZINFORM — Qazaqstanda jasandy ıntellekt e-Otinish platformasyna kelip túsetin ótinishterdi taldaýǵa jáne memlekettik qyzmetshilerdiń olarǵa jaýap berý jumysyn jedeldetýge kómektesedi. Bul týraly «Ulttyq aqparattyq tehnologııalar» AQ-nyń jasandy ıntellekt jónindegi basqarýshy dırektory Álibek Saılanbaev aıtty.
Onyń aıtýynsha, «Digital Kazakhstan 2029» strategııalyq sessııasy aıasynda memlekettik qyzmetterdi tsıfrlandyrý jáne jasandy ıntellektini engizý baǵytynda birqatar joba júzege asyrylyp jatyr.
Sondaı-aq bıyl Ulttyq jasandy ıntellekt platformasy iske qosylǵan. Ol memlekettik qyzmetshilerge jasandy ıntellekt quraldaryn paıdalanýǵa múmkindik beredi.
— ChatGPT, Claude sııaqty júıeler ınternette jáne sheteldik serverlerde jumys isteıdi. Al Ulttyq jasandy ıntellekt platformasy Qazaqstannyń aýmaǵyndaǵy óz serverlerimizde ornalasqan jáne ınternetke qosylmasa da jumys isteı alady. Onyń ishinde ulttyq úlken tildik modelder bar. Memlekettik qyzmetshiler osy quraldardy paıdalanyp, túrli jobalardy teksere alady, — dedi Álibek Saılanbaev.
Onyń aıtýynsha, platformaǵa azamattardan jyl saıyn mıllıondaǵan ótinish túsedi. Endi bul ótinishterdi óńdeý kezinde de jasandy ıntellekt qoldanylmaq.
— Bizge munda da jasandy ıntellekt kómektesedi. Úlken derekterdi jınap, taldaý arqyly ótinish túsken kezde oǵan qaı memlekettik organ jaýap bere alatynyn, kim jaýap berýi kerektigin anyqtaýǵa múmkindik bar. Sonymen qatar ótinishtiń qandaı zańnamamen baılanysty ekenin de anyqtaı alady, — dedi spıker.
Ol e-Otinish arqyly mazmuny qaıtalanatyn, spam sıpatyndaǵy nemese naqty máselege qatysy joq kóptegen ótinish túsetinin atap ótti.
Mundaı ótinishterdi zań boıynsha qaraý qajet bolǵanymen, jasandy ıntellekt olardy aldyn ala belgilep, memlekettik qyzmetshige jaýap daıyndaýǵa kómektese alady.
— Zań boıynsha biz árbir ótinishke jaýap berýimiz kerek. Biraq mundaı jaǵdaılarda jasandy ıntellekt ótinishti spam nemese negizsiz joldanǵan ótinish retinde belgilep, oǵan qalaı jaýap berý kerektigi týraly aldyn ala jaýap daıyndaýǵa kómektesedi. Osylaısha memlekettik qyzmetshiniń ýaqytyn únemdeıdi, — dedi ol.
Spıkerdiń aıtýynsha, jasandy ıntellekttiń kómegimen ótinishterdi óńdeý jyldamdyǵy birneshe ese artýy yqtımal. Bul naqty ótinishtiń mazmunyna baılanysty bolady.
— Eger buryn hat nemese jaýap daıyndaýǵa birneshe saǵat qajet bolsa, qazir oǵan birneshe mınýt jetkilikti bolýy múmkin. e-Otinish-te de solaı. Ótinish túsken kezde jasandy ıntellekt ony taldaıdy, máseleniń sıpatyn, tıisti belgilerdi, qandaı zańdarǵa qatysty ekenin jáne qandaı áreket jasaý kerektigin anyqtaıdy, — dedi Álibek Saılanbaev.
Onyń aıtýynsha, bul tehnologııanyń túpki maqsaty tek jaýap berý protsesin jyldamdatý emes, azamattarǵa beriletin jaýaptardyń sapasyn arttyrý.
— Bizdiń túpki maqsatymyz — memlekettik qyzmetshilerdiń azamattardyń ótinishterine sapaly jaýap berýine kómektesý, — dedi ol.
Álibek Saılanbaevtyń aıtýynsha, azamattar kóbine óz máselesi boıynsha qaı memlekettik organ jaýapty ekenin bilmeıdi. Sonyń saldarynan ótinish tıisti emes organǵa túsip, azamatqa másele onyń quzyretine jatpaıtyny týraly jaýap beriledi.
— Jasandy ıntellekt ótinish berýshige tıisti memlekettik organdy tańdaýǵa kómektesedi. Adamdar kóbine qaı memlekettik organnyń nemese mekemeniń belgili bir máseleni sheshýge jaýapty ekenin bilmeıdi. Bıyl tıisti memlekettik organdy anyqtaýǵa kómektesetin assıstentti iske qosamyz. Sonda negizsiz jaýaptar azaıady. Óıtkeni másele jaýapty organǵa birden tússe, jaýaptyń sapasy da artady, — dedi spıker.
Aıta keteıik, JI azamattarǵa arnalǵan biryńǵaı profıl qalyptastyrýǵa kómektesedi.
