JI aýdarmashylar men jýrnalısterdi jumyssyz qaldyrýy múmkin — Parlamenttik tyńdaý

ASTANA. KAZINFORM — Májilis tóraǵasy Erlan Qoshanov jasandy ıntellektini damytýǵa arnalǵan parlamenttik tyńdaýda «Microsoft» korporatsııasynyń osy sala týraly boljamyna toqtaldy. 

— Jasandy ıntellekt eńbek naryǵyna aıtarlyqtaı áser etedi. «McKinsey» kompanııasynyń boljamy boıynsha, 400 mıllıonnan astam adam jasandy ıntellekt saldarynan jumys oryndarynan aıyrylýy múmkin. «Microsoft» qazirdiń ózinde jasandy ıntellektini almastyratyn mamandyqtardy atady. Olardyń arasynda aýdarmashylar, jýrnalıster, redaktorlar, marketologtar, PR-mamandar bar, — dedi Erlan Qoshanov.

Sondaı-aq, ol JI memlekettik qyzmetkerlerdiń bir bóligin de almastyrýy múmkin ekenin aıtty.

— Jaqynda Albanııa memlekettik satyp alý sııaqty mańyzdy sala mınıstriniń qyzmetin jasandy ıntellektige senip tapsyrǵan alǵashqy el boldy. Jasandy ıntellekt saıası partııalardyń jumysyna da enip keledi.

Jýyrda ǵana japondyq «Qaıta órleý joly» partııasy jasandy ıntellektini partııa ishinde resýrstar bólý kezinde paıdalaný týraly sheshim qabyldady.

Degenmen, barlyq protsesterdiń draıveri áli de adam ekenin umytpaýymyz kerek, — dedi Májilis tóraǵasy.

Buǵan deıin Jasandy ıntellekt jáne tsıfrlyq damý mınıstrligi jańa logotıpin tanystyrǵanyn jazǵan edik.