JI arqasynda kúdikti tranzaktsııalardy anyqtaý 80 ese jedeldetildi — Ulttyq bank
ALMATY. KAZINFORM — Almatyda ótip jatqan Central Asia Fintech Summit sammıtinde Ulttyq bank tóraǵasy Tımýr Súleımenov jasandy ıntellekt kómegimen alaıaqtyqtyń aldyn alý jeńildetilgenin túsindirdi.
Ulttyq alaıaqtyqqa qarsy kúres ortalyǵynda engizilgen jasandy ıntellekt kúdikti tranzaktsııalardy taldaýdy 80 esege jedeldetti.
— Qazir alaıaqtar jasaıtyn tranzaktsııalar kóbeıip jatyr. Bir qyzmetker 100-200 kúdikti tólemdi bir ózi óńdep úlgermeıdi. Sondyqtan biz jasandy ıntellekt taldaýshysyn engizdik, bul jumys kólemin 80 esege azaıtty, — dedi Súleımenov.
Ulttyq bank tóraǵasynyń aıtýynsha, júıe aqparatty taldaýǵa jáne sheshim qabyldaýǵa kómektesedi.
Sondaı-aq Mastercard bas dırektory Sanjar Jamalov «multi-rail multi-money» áleminde tólem júıesi túsinikti bolý kerek ekenin aıtady. Ol JI arqyly jasalǵan qaýipsizdik júıesi baryn aıtty.
Sózinshe, alaıaqtyqtan qorǵaný úshin úsh deńgeıli qaýipsizdik júıesi qarastyrylǵan.
* Birinshi deńgeı árbir tranzaktsııanyń táýekelin baǵalaıdy jáne alaıaqtyq veb-saıttardy anyqtaıdy;
* Ekinshi deńgeı kúdikti tranzaktsııalardy anyqtaý úshin qurylǵy men tólem áreketin taldaıdy;
* Úshinshi deńgeı buryn belgisiz táýekelderdi erte anyqtaýǵa múmkindik beretin modelderdi qoldana otyryp, alaıaqtyqtyń jańa túrlerin boljaıdy.
Sonymen qatar Ulttyq bank aqsha-nesıe saıasaty sheshimderin taldaý úshin qoldanylatyn jasandy ıntellekt kómekshilerin engizdi.
Ulttyq bank bul jasandy ıntellekt kómekshilerin «Kógershin» jáne «Qarshyǵa» degen kodtyq ataýmen ataıdy. Bolashaqta «Úki» nemese «Fılına» degen JI-di qosýdy josparlap otyr.
Budan bólek Ulttyq bank antı-frod ortalyqtardyń arqasynda 120 mıllıard teńgeden astam soma jalǵan tranzaktsııalardyń aldyn alǵanyn aıtty.
Eske salsaq, Qazaqstanda jasandy ıntellekt pen kásibı bilimdi ushtastyratyn jańa model synaqtan ótetini aıtyldy.
