JI jumysyn jaqsartý úshin qazaq tilindegi derekter jınalyp jatyr – Jaslan Mádıev

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev qazaq tilindegi úlken tildik model KazLLM jumysy týraly aıtyp berdi.

Onyń aıtýynsha, Nazarbaev ýnıversıteti «Ulttyq aqparattyq tehnologııalar» kompanııasymen birigip, qazaq tilinde úlken tildik model (KazLLM) ázirleıdi. Bul model 100 mlrd tokenge negizdeledi.

«Modeldiń sapasyn jaqsartý úshin qazaq tilindegi derekterdi jınaý óte mańyzdy. Osy maqsatta ulttyq derekter jınaý naýqany Hugging Face platformasynda júrgiziledi. Qazirdiń ózinde ashyq kózderden 54 mlrd token, onyń ishinde 28 mlrd token qazaq jáne 26 mlrd token orys tilderinde jınaldy. Memlekettik jáne kvazımemlekettik organdardan, sondaı-aq BAQ pen muraǵattardan 90 terabaıt derek jınaldy», - dedi J.Mádıev Úkimettiń búgingi otyrysynda.

Sonymen birge, KazLLM halyqaralyq kompanııalarmen birlesip ázirlenedi. Atalǵan model ashyq kózderden alynǵan derekter negizinde 30-40 mlrd tokenge negizdeletin bolady. Bul joba óteýsiz tegin negizde jasalady.

«KazLLM-niń alǵashqy nusqasy osy jyldyń jeltoqsanynda usynylady. 2029 jylǵa qaraı biz jasandy ıntellekt salasyndaǵy patentter sanyn jylyna keminde 20-ǵa jetkizý josparlanýda. Qazaq tilinde jasandy ıntellekt daǵdylaryn oqytý jáne sapaly kontent jasaý úshin aýqymdy jasandy ıntellekt ekojúıesin qurý qajet. Ekojúıeni damytý sheńberinde halyqaralyq kompanııalarda (Microsoft, Google, Booking jáne t.b.) jumys isteıtin qazaqstandyq mamandardan jasandy ıntellekt ulttyq quramasy quryldy», - dedi mınıstr.

Aıta keteıik, elimizde 2024-2029 jyldarǵa arnalǵan Jasandy ıntellektti damytý tujyrymdamasy ázirlendi. Onda 5 mln adamdy jasandy ıntellekt daǵdylaryna úıretý; 500 myń salalyq maman daıarlaý; 5 qazaqstandyq biregeı kompanııa qurý; IT-eksportty 5 mlrd dollarǵa deıin ulǵaıtý; ekonomıka sektorlarynda jyl saıyn keminde 25 jasandy ıntellekt ónimderin engizý kózdelgen.