JI jumys izdep berip jatyr: Qazaqstanda 3 myń adam jumysqa ornalasty
ASTANA. KAZINFORM — Qazaqstanda Tsıfrlyq jumyspen qamtý qyzmeti jobasy arqyly azamattardy proaktıvti túrde jumysqa ornalastyrýdyń jańa formaty synaqtan ótkizilip jatyr. Bul týraly Úkimettiń bapsasóz qyzmeti málim etti.
Servıs jumys izdeýshiniń tsıfrlyq túıindemesin ózdiginen qalyptastyryp, jasandy ıntellekt kómegimen onyń bilimi, eńbek ótili men daǵdylaryn eskere otyryp, tıisti bos jumys oryndaryn irikteıdi.
— Biz memlekettiń jumysqa ornalasý múmkindigin proaktıvti túrde usynatyn modeline kóshýdemiz. Azamattyń kelisimimen onyń bilimi, eńbek ótili, negizgi daǵdylary men jeke qasıetteri týraly derekterdi avtomatty túrde jınaqtaıtyn tsıfrlyq túıindemesi qalyptastyrylady. Osy málimetter negizinde biz naqty azamattyń daǵdylaryna sáıkes keletin bos jumys oryndaryn iriktep, jumys izdeýshilerge joldaımyz. Joba iske qosylǵaly eki aı ishinde qatysýshylarǵa osyndaı 59 myń habarlama jiberildi. Búginde olardyń shamamen 3 myńy jumysqa ornalasty, — dedi eńbek jáne halyqty áleýmettik qorǵaý vıtse-mınıstri Bahtııar Jazyqpaev.
Joba osy jyldyń shilde aıynan bastap Pavlodar jáne Mańǵystaý oblystarynda pılottyq rejımde júzege asyrylýda. Qatysýshylar arasynda sońǵy 3 aıda jumysynan aıyrylǵan azamattar, JOO jáne TjKB túlekteri, esepte turǵan jumyssyzdar bar. Habarlama alǵannan keıin jumys izdeýshi bos jumys ornyna ótinim bere alady. Jumys berýshi óz jeke kabınetinde úmitkerdiń ótinimi men ol týraly aqparatty kórip, ony suhbattasýǵa shaqyra alady.
Bos jumys oryndaryn irikteýmen qatar, JI-kómekshi jumyspen qamtýǵa járdemdesýdiń qosymsha sharalaryn da usynady. Eger jumys izdeýshige qajetti daǵdylar jetispese, Enbek Skills platformasynda tegin onlaın oqýdan ótýge múmkindik bar.
Jańa mamandyqty meńgergisi keletinder úshin jumys berýshiniń tikeleı bazasynda dýaldy oqytý baǵdarlamalary qarastyrylǵan. Sondaı-aq júıe eńbek kúshi tapshy óńirlerge memlekettik qoldaý sharalarymen qonys aýdarý múmkindigin usynady. Onyń ishinde qonys aýdarýǵa beriletin birjolǵy tólem men turǵyn úımen qamtamasyz etý sharalary bar. Jumyspen qamtýǵa járdemdesýdiń memlekettik baǵdarlamalary aıasynda barlyq shara aqysyz kórsetiledi.
Buǵan deıin Joltap-ta oqyǵandardyń 60%-y jumysqa ornalasqanyn jazdyq.
