JI jasaǵan qytaılyq serıal 4 mlrd qaralym jınady
ASTANA. KAZINFORM – Qytaıda jasandy ıntellekt kómegimen túsirilgen qysqametrajdy serıaldar qarqyndy túrde tanymal bolyp keledi. Olardyń kórermender aýdıtorııasy 600 mln adamnan asty. Bul týraly Sınhýa agenttigi jazdy.
Eń tabysty jobalardyń biri – «Sýn áýleti kezindegi qarýly kúshter» serıaly. Ejelgi Qytaıǵa tap bolǵan zamanaýı áskerı qyzmetshiler týraly hıkaıa 4 mlrd-tan astam qaralym jınaǵan.
Jobamen bar bolǵany alty adamnan turatyn komanda jumys isteıdi. Olar árqaısysynyń uzaqtyǵy eki mınýttan aspaıtyn myń epızod túsirip úlgergen.
Jasandy ıntellekt óndiris shyǵyndaryn aıtarlyqtaı azaıtqan. Sala mamandarynyń málimetinshe, sapaly JI-serıal túsirý dástúrli túsirilimge qaraǵanda shamamen 10 ese arzanǵa túsedi. Sonymen qatar 100 qysqa epızodtan turatyn serıaldy nebári úsh kúnde daıyndaýǵa bolady.
2026 jyldyń alǵashqy on aıynda Qytaıda shamamen 550 myń qysqametrajdy serıal jaryq kórgen. Olardyń 94 paıyzdan astamy jasandy ıntellekt kómegimen jasalǵan. Al naryq kólemi alǵashqy bes aıda 22 mlrd ıýannan asqan.
Tanymaldyǵyna qaramastan, jobalardyń basym bóligi ázirge shyǵynǵa batyp otyr. DataEye saraptamalyq kompanııasynyń baǵalaýynsha, JI-serıaldardyń nebári 1,3 paıyzy ǵana paıda tabýǵa qajetti qaralym deńgeıine jetedi.
Sarapshylar salanyń negizgi máseleleri retinde sıýjetterdiń birkelkiligin, keıipkerler beınesin jasaýdaǵy qatelikterdi jáne joǵary básekelestikti ataıdy. Indýstrııanyń qarqyndy damýyna baılanysty Qytaı bıligi mundaı kontenttiń sapasyna baqylaýdy kúsheıtip jatyr.
Eske sala keteıik, buǵan deıin Dýbaıda ótetin halyqaralyq JI-fılmder baıqaýynda 1 mln dollar oınatylatyny habarlanǵan edi.