JI jarysy: Tsýkerberg sýperıntellekt jasaý úshin jańa zerthana qurdy

ASTANA. KAZINFORM – Meta kompanııasynyń bas dırektory Mark Tsýkerberg kompanııanyń jasandy ıntellekt (JI) salasyndaǵy bólimshelerin aýqymdy qaıta qurý týraly jáne Meta Superintelligence Labs (MSL) atty jańa zertteý tobyn qurý jaıly habarlady, dep jazdy AZƏRTAC.  Jańa bólimsheni salanyń jetekshi mamandary basqarady.

Bloomberg agenttiginiń habarlaýynsha, jańa qurylymnyń tizginin saladaǵy tanymal tulǵalar — Scale AI kompanııasynyń burynǵy bas dırektory Aleksandr Van men GitHub-tyń eks-basshysy Net Frıdman ustaıdy. Bul bólimshe buǵan deıin Llama irgeli úlgilerin, ónimdik JI sheshimderin jáne Fundamental AI Research (FAIR) jobalaryn ázirleýmen aınalysqan komandalardy biriktiredi.

Bul qadam Meta kompanııasynyń OpenAI jáne Google sııaqty iri básekelestermen júrip jatqan JI jarysynda kóshbasshylyqqa umtylysyn bildiredi. Kompanııa saladaǵy úzdik mamandardy belsendi túrde óz qataryna tartpaqshy. Aıta keterlik jaıt, buǵan deıin Meta OpenAI-dyń negizin qalaýshy Ilıa Sýtskever qurǵan Safe Superintelligence startapyn satyp alýǵa talpynǵan, biraq sátsiz aıaqtalǵan. Alaıda keıin kompanııa onyń seriktesteri — Frıdman men Danıel Grossty óz jobasyna tartýǵa qol jetkizdi.

Kompanııa óz ambıtsııalaryn iske asyrý úshin «juldyzdy komandany» jınady. Bul topqa GPT-4o jáne Gemini modelderiniń negizgi ázirleýshileri, sondaı-aq GPT-4o-dyń daýys rejımi men beıne generatsııa arhıtektýrasy boıynsha mamandar kirdi.

Qazirdiń ózinde mıllıardtaǵan aýdıtorııa qoldanatyn ónimderge engizilgen Llama 4.1 jáne 4.2 úlgilerin damytý jumystary qatar júrgizilip jatqanda, zerthana jańa býyndaǵy jasandy ıntellekt júıesin jasaýǵa kirispek. Mark Tsýkerberg bul jobanyń adamzat úshin «jańa dáýirdiń» bastaýy bolatynyna senimdi ekenin aıtty.

Kompanııa ókilderi Meta-nyń aýqymdy jobalardy damytýǵa arnalǵan erekshe resýrstary baryn atap ótti — sonyń ishinde qýatty esepteý ınfraqurylymy men aýqymdy ónim jasaý tájirıbesi. Basshylyqtyń pikirinshe, talantty mamandardyń kelýi ázirleý úderisin jedeldetip, ár qoldanýshyǵa jeke sýperıntellekt usynýǵa múmkindik beredi.

Buǵan deıin habarlanǵandaı, Meta Tsýkerbergtiń qaýipsizdigine 14 mıllıon dollar jumsaǵan.