JI jáne kitap: oqýshylardy oqýǵa baýlýdyń jańa tásilderi
ASTANA. KAZINFORM – Jazǵy demalys — oqýshylar úshin tek demalý ǵana emes, ózdiginen bilim alýǵa jol ashatyn kezeń. Osy oraıda, Qazaqstanda balalar men jasóspirimder arasynda oqyrman mádenıetin damytýǵa baǵyttalǵan bastamalar júıeli túrde jalǵasyp keledi. Bıyl oqýshylarǵa qandaı jobalar, usynystar jáne tsıfrlyq quraldar qoljetimdi bolatyny jóninde Kazinform agenttigi tilshisiniń materıalynan oqı alasyz.
Jazǵy oqyrman klýbtary men kitap marafondary
Oqý-aǵartý mınıstrliginiń málimetinshe, jazǵy kanıkýl kezeńinde oqýshylardy óz betinshe kitap oqýǵa tartýǵa erekshe kóńil bólinedi.
Mektepterde, kitaphanalarda jáne mektep janyndaǵy lagerlerde jazǵy oqyrman klýbtary, kitap kórmeleri, mánerlep oqý baıqaýlary, taqyryptyq oqýlar men shyǵarmashylyq kezdesýler uıymdastyrý josparlanǵan. Іs-sharalar oqýshylardyń jas ereksheligi men qyzyǵýshylyǵyna qaraı ótkiziledi.
Sonymen qatar jaz boıy respýblıkalyq aktsııalar, oqyrman marafondary, onlaın-chellendjder, esse jáne shyǵarmashylyq jumystar baıqaýlary ótpek. Aımaqtarda kitap oqýǵa arnalǵan belgili bir taqyryptaǵy jazbalar men beınerolıkter de jarııalanyp otyrady.
Oqýshylarǵa qandaı kitaptar usynylady
Jazǵy oqý úshin Respýblıkalyq ǵylymı-pedagogıkalyq kitaphana «Jazǵy oqyrman álemi» atty gaıdbýk ázirledi. Onda kanıkýl kezinde oqýǵa usynylatyn ádebıetter tizimi qazaq jáne orys tilderinde berilgen.
Kitaptar jas ereksheligine qaraı bólingen. 1–4-synyp oqýshylaryna ertegiler, dostyq, otbasy jáne tabıǵat týraly áńgimeler usynylady. 5–9-synyp oqýshylary otandyq jáne álem ádebıetiniń shyǵarmalary, shytyrman oqıǵalar men tarıhı prozalar, sondaı-aq ǵylymı-kópshilik baǵytyndaǵy kitaptarmen qamtylady. Al joǵary synyp balalaryna qazaq jáne álem klassıkasy, zamanaýı ádebıet, pýblıtsıstıka, ómirbaıandar, sondaı-aq ózin-ózi damytý, kóshbasshylyq jáne kásibı baǵdarǵa arnalǵan kitaptar usynylmaq.
Sonymen birge oqýshylarǵa óz qyzyǵýshylyqtaryna saı kitapty erkin tańdaýǵa múmkindik berilgen.
Mınıstr qandaı kitaptardy usynady
Buǵan deıin Qazaqstannyń Ǵylym jáne joǵary bilim mınıstri Saıasat Nurbek oqýshylar men jastarǵa Іlııas Esenberlınniń «Altyn Orda» trılogııasyn oqýǵa keńes bergen bolatyn.
Mınıstrdiń aıtýynsha, búginde Altyn Orda tarıhyna degen qyzyǵýshylyq Qazaqstanda da, shetelde de artyp keledi. Ol bul trılogııaǵa tarıhı oqıǵalar men keıipkerlerdiń kóptigine baılanysty «qazaqstandyq «Taqtar oıyny» dep baǵa bergen.
Kórkem ádebıetten bólek mınıstr Genrı Kıssındjer, Erık Shmıdt jáne Kreıg Mandı birlesip jazǵan «Genezıs: jasandy ıntellekt, úmit jáne adamzattyń jany» kitabyn da oqýǵa usyndy.
– Bul jasandy ıntellektini tek tehnologııa retinde emes, geosaıası, ekonomıkalyq, áleýmettik, mádenı jáne ıdeologııalyq faktor retinde tereń qarastyratyn óte mazmundy eńbek, - dedi ol.
Jasandy ıntellekt baqylaýyndaǵy oqý
Oqyrman mádenıetin damytýdaǵy mańyzdy quraldardyń biri — «Oqyrman» aqparattyq júıesi. Bul platforma oqyrman.kitaphana.edu.kz saıtynda qoljetimdi. Onda oqýshylar elektrondy kitap oqyp, pikir qaldyryp, esse jarııalap, óz oqý belsendiligin baqylaı alady.
Oqý-aǵartý mınıstrliginiń málimetinshe, esselerdi baǵalaý jáne oqyrmandar reıtıngin qalyptastyrý jasandy ıntellekt tehnologııalarynyń kómegimen júzege asyrylady. Júıe paıdalanýshylardyń jazbalary men belsendiligin taldaıdy.
Sondaı-aq oqýshylarǵa Digital Library tsıfrlyq kitaphanasy arqyly elektrondy kitaptar, oqý jáne kórkem ádebıetter qoljetimdi.
Áleýmettik jelidegi pikirler jáne otbasylyq oqý
Jazǵy naýqan aıasynda oqýshylarǵa oqyǵan kitaptary jóninde áleýmettik jelilerde #JazǵyOqyrman jáne #LetnııChıtatel2026 heshtegterimen jazba jarııalaý usynylady.
Sonymen qatar gaıdbýkta oqyrman kúndeligin júrgizý, otbasylyq kitap oqý dástúrin qalyptastyrý, kitap talqylaýlaryn uıymdastyrý, ádebı vıktorınalar men shyǵarmashylyq jobalar uıymdastyrý usynylady.
Eske sala keteıik, bıyl mamyr aıynda Memleket basshysy «Oqıtyn ult» mádenıetin damytý jáne oqý mádenıetin qalyptastyrý jónindegi Jarlyqqa qol qoıǵan bolatyn.
Aıta keteıik, mınıstrlik mekteptegi sabaq barysynda smartfondy paıdalanýǵa qatysty naqty normatıvti engizetin bolady.
