JI tehnologııalaryn oryndy paıdalaný ekonomıkalyq órkendeýdi jedeldetedi – Memleket basshysy
ASTANA. KAZINFORM – Memleket basshysy Qasym-Jomart Toqaev AÓSShK VII sammıtinde sóılegen sózinde Toqaev JI tehnologııalaryn oryndy paıdalaný ekonomıkalyq órkendeýdi jedeldetetinin, sondaı-aq memleketti basqarýdyń tıimdiligin arttyryp, tutas aımaqtyń damý múmkindigin keńeıte túsetinin atap ótti, dep habarlaıdy Aqordanyń baspasóz qyzmeti.
Osy oraıda, táýekelderdi birlesip baqylaý qajet.
– Jaqynda Vashıngtonda qol qoıylǵan Sýperıntellekt boıynsha kelisimdi quptaımyz. Shyn máninde, bul qujat Birikken Ulttar Uıymy aıasyndaǵy halyqaralyq sharttyń negizi bola alady. AÓSShK atalǵan úderiske zor úles qosýǵa qaýqarly ekenine senimdimin. Osy saladaǵy jahandyq kúsh-jiger aıasynda Qazaqstan Almatyda BUU ESKATO turaqty damý maqsattary úshin Azııa-Tynyq muhıty tsıfrlyq sheshimder ortalyǵyn ornalastyrady. Azııadaǵy ózara is-qımyl jáne senim sharalary jónindegi keńesine múshe memleketter aımaǵymyzdyń tsıfrlyq bolashaǵyn birge qalyptastyrý úshin Ortalyq jumysyna atsalysady dep oılaımyn, – dedi Memleket basshysy.
Prezıdent qazirgi tańda kez kelgen strategııalyq jobany júzege asyrý úshin aqparattyq qaýipsizdiktiń mańyzy zor dep sanaıdy. Ásirese, birneshe memleketke ortaq bastamalarda onyń máni arta túsedi.
– Búgin Qazaqstan men Ázerbaıjan mańyzdy kezeńge qadam basty. Elderimiz Kaspıı tabanymen tartylǵan Transkaspıı talshyqty-optıkalyq baılanys jelisin iske asyrýǵa kiristi. Tsıfrlyq Jibek joly biregeı jobasy Eýrazııa keńistiginde anaǵurlym jyldam ári qaýipsiz málimet almasýǵa múmkindik beredi. Sonymen qatar Azııanyń tsıfrlyq áleýetin nyǵaıtyp, yntymaqtastyqtyń tyń baǵyttary ashylady, – dedi Qasym-Jomart Toqaev.
Osyǵan deıin Qasym-Jomart Toqaev AÓSShK-ni biregeı halyqaralyq forým dep ataǵan bolatyn.
