JI taıfýndardyń baǵytyn boljaýda joǵary dáldik kórsetti
ASTANA. KAZINFORM — Jasandy ıntellekt ótken aıda Tynyq muhıtynda qalyptasqan «Champı» taıfýnynyń qozǵalys baǵyty ózgeretinin aldyn ala boljady, dep habarlaıdy Kazinform Kyodo agenttigine silteme jasap.
Japonııada jasandy ıntellekt kómegimen jasalǵan taıfýn traektorııasynyń boljamdary fızıkalyq esepteýlerge negizdelgen dástúrli meteorologııalyq modelderge qaraǵanda dálirek nátıje kórsetip otyr.
Dástúrli meteorologııalyq modelder temperatýra, atmosferalyq qysym jáne sý býynyń mólsheri týraly derekterdi fızıka zańdaryna súıene otyryp, sýperkompıýterler arqyly óńdeıdi. Al JI júıeleri aýa raıyna qatysty tarıhı derekterdiń úlken kólemin taldap, ondaǵy zańdylyqtardy anyqtaıdy jáne olardy atmosferanyń qazirgi jaǵdaıymen salystyrady.
Bıyl tirkelgen 30-shy taıfýn – «Champı» osynyń aıqyn mysaly. Ol 15 qazanda Tynyq muhıtynda paıda bolyp, áý basta batys baǵytta qozǵalǵan. 19 qazanǵa qaraı dástúrli meteorologııalyq modelderge súıengen boljamdardyń basym bóligi taıfýn Qytaı jaǵalaýyna jaqyndaıdy degen boljam jasaǵan.
Al JI modelderi taıfýn Okınavanyń soltústiginen ótip, Shyǵys Qytaı teńiziniń ústinde baǵytyn ózgertetinin boljaǵan. Keıin ol Japonııanyń Kıýsıý aralynan ońtústik-batysqa qaraı ornalasqan Nanseı araldaryna jaqyndaǵan soń, shynymen de baǵytyn kúrt ózgertken.
Japonııa meteorologııalyq zertteý ınstıtýty sarapshylarynyń aıtýynsha, JI taıfýndardyń baǵytyna áser etetin Tynyq muhıtyndaǵy antıtsıklon men batys jelderiniń yqpalyn dál boljaıdy. Sondaı-aq olardyń baǵyty qashan ózgeretinin de anyqtaı alady.
Alaıda bul tehnologııanyń da shekteýleri bar. Sarapshylardyń aıtýynsha, JI taıfýndardyń kúshin boljaýda dástúrli modelderden áli de artta. Sondyqtan jaýyn-shashyn mólsheri men jel jyldamdyǵyn dál anyqtaý qıyn.
Buǵan deıin Qazaqstanda qýańshylyq pen sý tasqynyn boljaý úshin JI qoldanyla bastaıtyny habarlanǵan bolatyn.