JI taqta muǵalimniń jazýyn bir sátte 3D-modelge aınaldyra alady
ASTANA. KAZINFORM — Shanhaıdaǵy tehnologııalyq kórmede qytaılyq iFlytek kompanııasy qoljazba mátindi taný jáne úsh ólshemdi grafıkalyq modelderdi avtomatty túrde jasaý fýnktsııalary bar Tongchuang ınteraktıvti mektep panelin tanystyrdy. Bul týraly 24 kg jazdy.
Bul qurylǵy synyptardy jabdyqtaý tásilin ózgertip, dástúrli bor men markerdiń ornyna sensorly panel qoldanýǵa múmkindik beredi. Muǵalim matematıkalyq teńdeýdi jazǵan kezde, júıe birneshe sekýndtyń ishinde daıyn grafıkti qurastyrady.
Eger ustaz ekranǵa qolmen jazyq geometrııalyq fıgýra salsa, kiriktirilgen algorıtm onyń durys qyrlaryn tolyqtyryp, sýretti ekranda aınaldyrýǵa bolatyn kólemdi 3D-modelge aınaldyrady.
Qurylǵynyń jumys júıesi birneshe baǵdarlamalyq quraldar keshenine negizdelgen: arnaıy modýl jazylǵan syzyqtardy qabyldap, tańbany nemese fıgýrany tanıdy, onyń qaı pánge qatysty ekenin anyqtaıdy, sodan keıin matematıkalyq esepteý júıesin nemese geometrııalyq model qurastyrý quralyn iske qosady.
Nátıjesinde jasalǵan keskinderdi qurý úshin tekserilgen baǵdarlamalyq kod paıdalanylady. Bul formýlalar men grafıkterdiń jasandy ıntellekt tarapynan qate nemese burmalanyp jasalý qaýpin azaıtady.
Muny oılap tapqandardyń málimetinshe, osyndaı júıeler Qytaıdyń 33 óńirinde engizilip jatyr. Olar 1 400-den astam aýdannyń bilim berý salasyn qamtıdy. Sonymen qatar Spark Teacher Assistant daýystyq kómekshisin shamamen 1 mıllıon muǵalim paıdalanady.
Qurylǵynyń naryqtaǵy uqsas tehnologııalardan basty ereksheligi — protsesterdi tolyq avtomattandyrýynda. Muǵalimge qosymshalardy qolmen aýystyrýdyń nemese arnaıy kitaphanalardan úsh ólshemdi nysandardy izdeýdiń qajeti joq.
Sonymen birge sala sarapshylary jeke derekterdiń qorǵalýy máselesine nazar aýdaryp otyr. Sebebi taqta kameralarmen jáne sabaqtardy jazý fýnktsııasymen jabdyqtalǵan. Sondaı-aq bul tehnologııanyń kádimgi proektorlarmen salystyrǵandaǵy naqty tıimdiligi áli de qosymsha zertteýdi qajet etedi.
Aıta keteıik, Qytaı adamtektes robot shyǵarýdan kósh bastap tur.
