Jıi sónetin jaryq: Atyraýda elektr jelilerin jańǵyrtý qalaı júrip jatyr
ATYRAÝ. KAZINFORM – Atyraý qalasynda jaryq jıi sónedi. Turǵyndardyń júıkesine tıetin elektr jelilerindegi túıtkildi oń sheshý úshin ne istelip jatyr?
«Atyraý-Jaryq» AQ prezıdentiniń orynbasary Qýanyshbek Jumıevtiń aıtýynsha, jyl basynda Atyraý qalasynda qosalqy stansada elektr symdary, Jylyoı aýdanyndaǵy eki elektrobekettiń nysandaryn aýystyrý kózdelgen. Alaıda, tabıǵı sıpattaǵy tótenshe jaǵdaıǵa baılanysty qurylys eki aıǵa toqtatylǵan.
– Sý tasqyny toqtaǵannan keıin bul jumys qaıta jandandy. Maýsym aıynda Atyraý qalasyndaǵy Aqjar eldi mekeni men «Almagúl» shaǵynaýdanyndaǵy qosalqy stansalar, Jylyoı aýdanynyń Jańaqaraton kentindegi energetıkalyq nysannyń qurylǵysy aýystyryldy. Endi oblystyq ákimdikpen aradaǵy kelisimshartqa baılanysty apattyq jaǵdaıdaǵy 1409 baǵanany jańǵyrtý qolǵa alyndy, - deıdi Qýanyshbek Jumıev.
«Atyraý Jaryq» AQ qalalyq elektr júıeleriniń bas ınjeneri Nurjan Jumabaevtyń aıtýyna qaraǵanda, munaıly shahardaǵy «Nursaıa» jáne «Jeruıyq» shaǵynaýdanynda elektr jelisi jıi isten shyǵady.
Bul túıtkildi joıý úshin 32 shaqyrym elektr jelisin jańartý josparlanǵan. Osy kezge deıin «Nursaıa» shaǵynaýdanyndaǵy 20 shaqyrymdy quraıtyn jerasty elektr jelisi jańartylǵan.
– Qazir atalǵan shaǵynaýdandaǵy 60-qa jýyq kópqabatty úı men «Tulpar», «Bolashaq» jáne «Suńqar» turǵyn úı keshenderiniń jerasty kabeli aýystyryldy. Óıtkeni, sońǵy jyldary «Nursaıa» turǵyndarynan jaryq máselesi boıynsha shaǵym kóp túsedi. Oǵan sebep, 16 jyl buryn qoldanysqa berilgen turǵyn úılerdiń elektr kabeli eskirgen. Osyǵan baılanysty avarııalyq jaǵdaıda kabelge jalǵanatyn mývtalar shamadan tys kóbeıgen. Naqtylaı aıtqanda, erasty elektr kabeline jalǵanǵan mývta sany normatıvten asyp ketip otyr. Sonyń saldarynan elektr energııasy nasharlap, turǵyndar tarapynan shaǵymdanýyna ákelip soqtyrdy. Bul túıtkildiń sebebin zerdeleı kele, jerasty elektr jelisin polıetılenmen qaptalǵan ózin-ózi oqshaýlaǵysh zamanýı kabelge aýystyrdyq, - deıdi Nurjan Jumabaev.
Onyń dereginshe, qazir «Nursaıa» shaǵynaýdany turǵyndarynan 109 baılanys ortalyǵyna jaryq máselesine qatysty túsetin shaǵym sany 4 esege azaıǵan. Máselen, mamyr-qyrkúıek aılarynyń aralyǵynda atalǵan ortalyqqa 2169 shaǵym túsken. Al, sońǵy 3 aıda 559 shaǵym berilgen.
Elektr jelisindegi túıtkil aýdandarda da bar. Atyraý oblystyq energetıka jáne turǵyn úı-kommýnaldyq sharýashylyq basqarmasy ınjenerlik ınfraqurylymdy damytý bóliminiń bas mamany Ádilet Baqtyǵalıevtyń málimetinshe, máselen, Isataı aýdanynda ornalasqan Toman aýylyndaǵy elektr jelisi tozǵan. Bul aýyl turǵyndarynyń renishin týǵyzǵan.
- Bul másele oń sheshimin tapty deýge bolady. Qazir aýyldaǵy elektr jelisi qaıta jańǵyrtylyp, H.Erǵalıev aýylyndaǵy №83 «Novobogat» 110/10 kVt qosalqy transformatorynan 30 shaqyrym elektr jelisi tartylyp jatyr. Ony atqarýdy bas merdiger – «Aıkom Ltd» JShS qolǵa aldy. Qosalqy stansaǵa uıashyq qoıylyp, elektr jabdyqtaryn ornatý bastaldy. Turǵyndarǵa ýaqytsha kerneý osy aıdyń aıaǵynda paıdalanýǵa beriledi. Ony tolyqtaı iske qosý jyl aıaǵyna josparlanyp otyr, - dedi Ádilet Baqtyǵalıev.
Atyraý oblysynyń energetıkalyq kesheni baspasóz qyzmetiniń málimetine súıensek, «Atyraý jaryq» AQ 32 transformatordy jańasyna aýystyrǵan.
Aıtalyq, Jylyoı men Maqat aýdanynyń árqaısysynda osyndaı 6 transformator ornatylǵan. Atyraý qalasy men Qyzylqoǵa aýdanynda 4, Mahambet, Isataı, Inder jáne Qurmanǵazy aýdanyna 3 transformatordan bólingen.
– 2024-2029 jyl aralyǵynda «Yntalandyrý» jobasyna sáıkes turǵyndardy sapaly, ári turaqty elektr energııasymen qamtamasyz etý josparlanǵan edi. Osyǵan baılanysty elektr energııasyn jetkizýshi kásiporyn balansyndaǵy 742,058 shaqyrym áýe, 1,745 shaqyrym kabel jelisine, 14 qosalqy stansaǵa, 76 tranformatorǵa kúrdeli jóndeý júrgizildi. Buǵan qosa elektr taratatyn beketter de jóndeldi. Endi aldaǵy jyly 473,271 shaqyrymǵa jýyq áýe, 1,215 shaqyrym kabel jelisine, 9 qosalqy stansa men 66 tranformatorǵa, taratýshy beketterge kúrdeli jóndeý júrgizý josparlanyp otyr, -dep málim etti keshenniń baspasóz hatshysy Elvıra Rahymjanqyzy.
Atyraý qalalyq turǵyn úı-kommýnaldyq sharýashylyq jáne turǵyn úı ınspektsııasy bóliminiń sektor meńgerýshisi Oljas Hasanovtyń pikirinshe, bólim balansynda 548 transformator bar. Bıyl 30 transformator jańartylǵan.
– Transformatorlardy jyl saıyn jańartý kezeń-kezeńimen júrgiziledi. Edektr energııasymen jabdyqtaýshy kásiporynmen ekijaqty kelisim aıasynda uzyndyǵy 32 shaqyrym jerasty jelisi aýystyrylýy tıis. Osy kezge deıin josparlanǵan jumystyń 70 paıyzy atqaryldy. Endi jyl sońyna deıin «Juldyz», «Juldyz-3», «Vodnıkov» shaǵynaýdandary men B.Amanshın, B.Qulmanov kóshelerindegi, Q.Sátpaev dańǵylyndaǵy elektr jelisin aýystyramyz, - deıdi Oljas Hasanov.
Reseı Federatsııasymen shekaradaǵy Qurmanǵazy aýdanyndaǵy aýyldarda da elektr jelisin jańartý qolǵa alynǵan. Aýdan ákimdiginiń baspasóz qyzmetinen málim etkendeı, 17 aýyldyq okrýgte 1445 jaryq shamy, 1100 baǵana men 3 transformator ornatylǵan. Elektr enegrııasyna jetkizetin 26400 metr elektr jelisi aýystyrylǵan.
– Bıyl «Óńirlerdi damytý» baǵdarlamasy aıasynda Súıindik, Jańatalap, Safon, Maqash, Kóptoǵaı, Bókeı han aýyly tolyqtaı jaryqtandyryldy. Turǵyndar sany kóp Aqkól aýylynda 54 shaqyrym elektr jelisi tartylyp, kóshelerge jaryq shamy ornatyldy. Bul aýylda qosalqy stansanyń qurylysyn jyl sońyna deıin aıaqtaý josparlanyp otyr. Qazir aýylda 605 elektr baǵanasy ornatylyp, 23 shaqyrym kabel jáne áýe jelisi tartyldy, - dedi aýdan ákiminiń baspasóz hatshysy Gúlhat Hamza.
