JI sheshim qabyldaýshy emes, kómekshi qural ǵana bolýy kerek – ǵalym
ASTANA. KAZINFORM – Astana IT ýnıversıteti Jasandy ıntellekt ortalyǵynyń dırektory Beıbit Ábdikenov «Ortalyq Azııa jáne jasandy ıntellektiniń jahandyq etıkasy: syn-qaterler men keleshegi» atty halyqaralyq konferentsııasynda jasandy ınttelektiniń mańyzy týraly aıtty.
– Qazirgi tańda JI bizdiń elde ǵana emes, búkil álemde ártúrli salada keńinen qoldanysqa enip keledi. Astana IT ýnıversıteti de medıtsına, agrotehnıka, ındýstrııa salasynda kóptegen ǵylymı joba jasap jatyr. Ózimizdiń jobamyz – qaterli isikti boljaýǵa qatysty. Bul jerde etıka máselesi óte mańyzdy. Birinshiden, munda qoldanylatyn aqparattar qanshalyqty durys óńdeledi? JI-di úıretetin aqparattarǵa qanshalyqty durys saraptaý jasalǵan jáne ol qanshalyqty sapaly? Etıka turǵysynan atalǵan máseleler óte mańyzdy, óıtkeni aqparat sapasyz jınalsa, JI durys boljam jasaı almaıdy, - deıdi ǵalym.
Spıkerdiń aıtýynsha, jasandy ıntellektini úıretý úshin oǵan sol taqyrypqa qatysty óte kóp aqparat júktelip, keıin saraptaý, ajyratý pármenderi engiziledi. Sodan soń ǵana JI málimetterdi óz betinshe óńdeıtin qabiletke ıe bolady. Deıturǵanmen, maman sońǵy sheshimdi adam qabyldaýy kerek dep sanaıdy.
– Sheshimdi adam qabyldaı ma, álde júıe qabyldaı ma degen etıkalyq saýal bar. Ǵalym retinde, meniń óz kózqarasym JI bizge tek kómekshi qural bolýy tıis. Al sońǵy sheshimdi qaı salada bolmasyn adam qabyldaýy kerek, - deıdi Beıbit Ábdikenov.
Konferentsııada Ortalyq Azııa elderinde jasandy ıntellektini engizý barysynda týyndaıtyn qazirgi syn-qaterler men múmkindikter, sondaı-aq ıÝNESKO-nyń jasandy ıntellekt etıkasy jónindegi usynymdaryn óńirlik kontekste beıimdeý joldary talqylandy.
Aıta keteıik, buǵan deıin Qazaqstanda aldaǵy bes jyl ishinde 1 mln-ǵa jýyq adamdy jasandy ıntellekt negizine baýlý júrgiziletinin jazǵan edik.