JI sheneýnikterdi almastyra ma
ASTANA.KAZINFORM – Jasandy ıntellekt memlekettik qyzmetshilerdi almastyrýdy maqsat etpeıdi. Onyń negizgi mindeti – memlekettik apparat jumysynyń tıimdiligin arttyrý. Bul týraly jýrnalısterdiń suraǵyna jaýap bergen Jasandy ıntellekt jáne tsıfrlyq damý vıtse-mınıstri Bahtııar Muhametqalıev málimdedi.
Vıtse-mınıstrdiń aıtýynsha, basty maqsat adamdardy tehnologııamen almastyrý emes, olardyń jumys tıimdiligin arttyrý.
– Bul jerde qandaı da bir almastyrý maqsaty joq. Mindet tıimdilikti arttyrý. Jalpy, jasandy ıntellekt tehnologııasynyń ózi keıbir mamandyqtarǵa áser etetini sózsiz. Buǵan deıin de ındýstrııalyq revolıýtsııa boldy. Esterińizde bolsa, bý qozǵaltqyshynyń paıda bolýy eńbek qurylymyn túbegeıli ózgertti. Bul jerde de qaıtalap aıtamyn: sheneýnikterdi almastyrý degen mindet joq. Mindet – olardyń jumysyn kúsheıtý , – dep túsindirdi Bahtııar Muhametqalıev.
Ol strategııanyń jeke bir baǵyty adamı kapıtaldy damytýǵa arnalǵan, onyń aıasynda halyqtyń ártúrli toptaryna arnalǵan arnaıy baǵdarlamalar qarastyrylǵanyn atap ótti.
Bahtııar Muhametqalıevtiń aıtýynsha, tsıfrlyq transformatsııanyń negizgi baǵyttarynyń biri – jasandy ıntellektini memlekettik apparatqa engizý. Bul rette protsesterdiń tıimdiligin 30 paıyzǵa deıin arttyrý mindeti qoıylǵan.
Ol memlekettik qyzmetshiler ýaqytynyń edáýir bóligi tapsyrmalarǵa jaýap daıyndaýǵa, aqparat jınap, ony tekserýge, sondaı-aq materıaldardy beıindi departamenttermen, mınıstrliktermen jáne basqa da memlekettik organdarmen kelisýge jumsalatynyn túsindirdi.
Jasandy ıntellekt osy jumystardyń bir bóligin avtomattandyra alady. Atap aıtqanda, ol úlken kólemdegi aqparatty jyldam óńdeýge, qysqasha qorytyndy daıyndaýǵa, qajetti málimetterdi tabýǵa jáne jaýap jobalaryn ázirleýge múmkindik beredi.
– Qazir engizý barysynda, ózim aıtqandaı, bir mınıstrlikte pılottyq rejımde qoldanyp jatyrmyz. Ol jaýap jobalaryn daıyndaýǵa, qajetti aqparatty birden tabýǵa múmkindik beredi. Bul rette zańnama talaptary saqtalady, – dedi vıtse-mınıstr.
Sonymen qatar ol jasandy ıntellektini memlekettik apparatqa engizýdiń ózindik erekshelikteri bar ekenin atap ótti. Sebebi bul jerde qupııa ári sezimtal aqparatpen jumys isteý máselesi bar jáne aqparattyq qaýipsizdik talaptaryn saqtaý qajet. Jasandy ıntellektiniń arqasynda memlekettik qyzmetshilerdiń ýaqyty únemdelip, olar bosaıtyn ýaqytty anaǵurlym mańyzdy mindetterge baǵyttaı alady.
– Zaman talabyna saı júrý mańyzdy. Tipti odan da jaqsysy – zamannan ozyp, osy tehnologııalardy beıimdeı bilý nemese olardy ózimiz jasaý, – dep atap ótti ol.
Buǵan deıin tsıfrlandyrýǵa baılanysty HQKO qyzmetkerleri qysqartylmaıtynyn jazǵanbyz.
