JI salasynyń álemdik sarapshysy Kaı-Fý Lı memlekettik organdarǵa arnalǵan «AI Class» kýrsyn ótkizdi
ASTANA. KAZINFORM – GITEX AI Kazakhstan 2026 jahandyq forýmy qarsańynda Almatyda eldiń tsıfrlyq transformatsııasyn ilgeriletýge baǵyttalǵan mańyzdy bilim berý is-sharasy ótti.
Onda jasandy ıntellekt salasyndaǵy halyqaralyq deńgeıdegi sarapshy, doktor Kaı-Fý Lı Qazaqstannyń negizgi memlekettik jáne kvazımemlekettik sektor basshylaryna arnalǵan «AI Class» avtorlyq kýrsyn ótkizip, tájirıbesimen bólisti. Baǵdarlamaǵa Qazaqstannyń tsıfrlandyrý salasynyń ókilderi qatysty, onyń ishinde Qazaqstan Respýblıkasy Premer-Mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev, Qazaqstan Respýblıkasy Prezıdentiniń kómekshisi Qýanyshbek Esekeev, Ulttyq Bank tóraǵasy Tımýr Súleımenov, sondaı-aq «Qazaqtelekom» AQ, «UAT» AQ jáne basqa da kvazımemlekettik uıymdardyń basshylary boldy.
Doktor Kaı-Fý Lı – venchýrlyq kapıtalıst jáne jasandy ıntellekt taqyrybynda birneshe bestsellerdiń avtory. Ol Qazaqstan Respýblıkasy Prezıdenti janyndaǵy jasandy ıntellektti damytý jónindegi keńestiń múshesi retinde strategııalyq mańyzdy qyzmet atqarady. Bul qyzmetinde ol memlekettik organdarǵa saraptamalyq qoldaý kórsetip, ulttyq damý strategııasyn qalyptastyrýǵa jáne memlekettik basqarý men ekonomıkanyń tsıfrlanýyna JI tehnologııalaryn engizýge yqpal etedi.
Oqytý barysynda doktor Lı jasandy ıntellektti jańa óndiristik júıe jáne ónimdilik ınfraqurylymy retinde jan-jaqty taldady. Onyń aıtýynsha, jasandy ıntellekt – ekonomıkanyń ósýin jedeldetetin eń mańyzdy draıver sanalady. Tehnologııalardyń quny 175 esege deıin tómendegen qazirgi jaǵdaıda tabystyń negizgi faktory – JI júıelerin jyldam engizý jáne olarmen tıimdi jumys isteý qabileti.
Baǵdarlamada avtonomdy JI-agentterdiń damýy, jahandyq tehnologııalyq jaǵdaı jáne memlekettik sektorda jasandy ıntellektti qoldaný úlgileri qarastyryldy. Qatysýshylar modelder men quraldardy biriktirýge arnalǵan platformalyq sheshimdermen, sondaı-aq adam men algorıtmderdiń ózara árekettesýiniń zamanaýı ádisterimen, onyń ishinde prompt-ınjınırıng jáne «vibe-coding» tásilderimen tanysty.
Bul oqytý sessııasy aldaǵy forýmǵa daıyndyq aıasynda tehnologııalyq sala mamandaryn daıarlaýdyń bir kezeńi boldy. Sessııa sońynda qatysýshylar vedomstvolarynda ınnovatsııalyq jobalardy júzege asyrý úshin qajetti teorııalyq bilim men praktıkalyq daǵdylardy aldy.
Aıta keteıik, erteń Almatyda Ortalyq Azııadaǵy eń iri jasandy ıntellektke arnalǵan tehnologııalyq kórme – GITEX AI Kazakhstan 2026 bastalady. Forýmǵa 60-tan astam elden saıasatkerler, tehnologııalyq kompanııalar, startaptar jáne ınvestorlar qatysady. Olardyń qatarynda Cisco, Cloudflare, Google Cloud, Huawei, Dell, H3C Technologies, Lenovo, Trend Micro, Hikvision, HP, Noventiq, Redington, Salesforce, Vertiv, Yandex jáne basqa da álemdik tehnologııalyq kompanııalar bar.
Buǵan deıin qazaqstandyq stýdentter ázirlegen JI jobasy Nıý-Iorkte jeńiske jetkenin habarlaǵanbyz.
