JI salasynda jumys isteıtin kreatıvti jastar qajet - Astana IT ýnıversıteti

ASTANA. KAZINFORM – Astana IT ýnıversıteti Tsıfrlyq memlekettik basqarý mektebiniń dekany elimizde jasandy ıntellekt baǵytynda jumys isteıtin mamandardyń tapshy ekenin aıtady. Bul týraly ol «KISI GPS: Gylym. Pikir. Sayasat» ulttyq saraptamalyq alańynyń otyrysynda habarlady.

 – Kez kelgen transformatsııada úsh negizgi faktor bar: adamdar, protsester, tehnologııalar. Tehnologııa boıynsha, Qudaıǵa shúkir, jaqsy ilgerilep kelemiz. Bizde bir emes, eki sýperkompıýter bar, esepteý qýatymyz jetkilikti. Protsester boıynsha Prezıdent qazirgi bıýrokratııalyq paradıgmada óte oryndy sheshim qabyldady. Jańa mınıstrliktiń basshysyn Premer-Mınıstr dárejesinde taǵaıyndaý — ár sala men vedomstvo arasyndaǵy úılestirýdi jeńildetedi. Sondaı-aq mınıstrlikke tek tsıfrlyq damý men jasandy ıntellekt baǵytyna shoǵyrlaný mindeti berildi — aeroǵarysh, ınnovatsııa sııaqty ózge salalar alynyp tastaldy. Sondyqtan bul reformany tıimdi júzege asyrý úshin basqarý júıesi men tehnologııalyq baza bar. Biraq endi basty másele — adamı kapıtal, – deıdi Áltaıyr Ahmetov.

Maman standarttan tys oılaıtyn jastardy dál osy salada jumys isteýge shaqyrdy:

– Maman joq dep aıta almaımyz, biraq jetkilikti de emes. Bul jerde ýnıversıtetter kadr daıarlaýda sheshýshi ról oınaıdy. Bizge qazir kreatıvti, standarttan tys oılaıtyn, bolashaqty kóre alatyn jastar kerek. Jasandy ıntellektti qoldaný — sheksiz múmkindikterge jol ashady. Bizdiń jastar — daryndy, kreatıvti. Sondyqtan bul olardyń serpilis jasaýyna úlken múmkindik. Qazaqstannan álemge jańalyq usynatyn kezeń keldi, – dedi ol.

Eske sala keteıik, QR Premer-mınıstri Oljas Bektenov Oqý-aǵartý mınıstrligine bilim berý júıesine jasandy ıntellektini engizý jónindegi Jol kartasyn ázirleýdi tapsyrdy.