JI-Parlament: Qazaqstan BUU alańynda AI-Quryltai platformasyn tanystyrdy
ASTANA. KAZINFORM — Jenevadaǵy Ulttar saraıynda Qazaqstan delegatsııasy jasandy ıntellekt qoldanylatyn tsıfrlyq parlamenttik platforma - AI-Quryltai jobasyn tanystyrdy. Tanystyrylym BUU-nyń Jenevadaǵy bólimshesiniń «Qazaqstan» zalynda ótti.
Qazaqstandyq delegatsııa quramynda «Ádilet» partııasy tóraǵasynyń orynbasary Qanysh Tóleýshın, Qazaqstan Respýblıkasy Quryltaıynyń Tsıfrlandyrý, ınnovatsııalar jáne ǵylym komıtetiniń tóraǵasy Darhan Ahmedıev jáne Tsıfrlyq úkimetti qoldaý ortalyǵynyń bas dırektory Álııa Ospanova bar.
Іs-shara kirispe beınerolıkti kórsetý men quttyqtaý sózderden bastaldy. Qatysýshylarǵa Qazaqstan Respýblıkasy Quryltaıynyń 2027–2029 jyldarǵa arnalǵan JI-strategııasy, e-Quryltai ıntegratsııalanǵan tsıfrlyq parlamenttik platformasy jáne parlamenttik qyzmette jasandy ıntellektini qoldaný baǵyttary tanystyryldy.
Baǵdarlamanyń jekelegen bloktary parlamenttik zertteýler men taldaýǵa, JI qoldaný arqyly zań jobalaryn ázirleý men quqyqtyq saraptama júrgizýge, sondaı-aq JI-zerthananyń qyzmetine arnaldy.
Strategııaǵa sáıkes, AI-Quryltai tsıfrlyq protsesterdi, parlamenttik derekterdi, quqyqtyq bilim men zııatkerlik servısterdi biryńǵaı qorǵalǵan ortada biriktire otyryp, e-Quryltai júıesin damytýdyń kelesi kezeńine aınalady. Bul transformatsııanyń negizgi maqsattary - zań shyǵarý sapasyn, qabyldanatyn sheshimderdiń negizdiligin, parlamenttik baqylaýdyń tıimdiligin jáne qoǵammen ózara is-qımyldyń ashyqtyǵyn arttyrý.
AI-Quryltai platformasynyń praktıkalyq mindeti - jasandy ıntellektini qoldaný arqyly depýtattar jumysynyń tıimdiligin arttyrý. Ázirlenip jatqan quraldar parlamenttik derekter men azamattardyń ótinishin taldaýǵa, zertteýler júrgizýge, taldamalyq materıaldar daıyndaýǵa jáne zań jobalaryn ázirleý protsesin súıemeldeýge múmkindik beredi.
AI-Quryltai júıesiniń negizinde memlekettik derekter men parlamenttik jumys quraldary biriktirilgen tildik modelder jáne mamandandyrylǵan jasandy ıntellekt agentterinen turatyn ózindik tsıfrlyq platforma jatyr. Sheshim qabyldaýdy qoldaý júıesi júıeli máselelerdi anyqtaýǵa jáne usynylatyn sharalardyń saldaryn baǵalaýǵa kómektesse, quqyqtyq ıadro óz kezeginde normalardyń ózara baılanystaryn taldaýǵa jáne zańnamalyq ózgeristerdi ázirleýge múmkindik beredi. Jergilikti modelder jabyq nusqada jumys isteıdi, al qorytyndylar bolsa, tekseriletin derekkózderge, taldaý ádistemelerine jáne saraptamalyq baǵalaýǵa súıenedi. Mundaı tásil azamattyń ótinishinen bastap sheshimdi daıyndaýǵa jáne onyń oryndalýyn baqylaýǵa deıingi búkil protsesti súıemeldeýge tolyq múmkindik beredi.
JI-di jaýapkershilikpen qoldanýǵa da aıryqsha nazar aýdaryldy. JI-zerthana sheshimderdi engizbes buryn olardyń dáldigin, qaýipsizdigin jáne quqyqtyq zańdylyǵyn synaqtan ótkizý men baǵalaýdy qamtamasyz etedi. JI kómegimen daıyndalǵan materıaldar mamandardyń tekserýinen ótedi, al túpkilikti sheshimder úshin jaýapkershilik adamdardyń ózinde qalady. Aqparatpen jumys isteý qoljetimdilikti shekteý jáne kıberqaýipsizdik talaptaryn saqtaý qaǵıdattaryna negizdeledi.
Baǵdarlama qorytyndy sózdermen, parlamenttik ınnovatsııalar máseleleri jónindegi joǵary deńgeıdegi dıalogpen jáne pikir almasýmen aıaqtaldy.
