JI oraldyq sýretshiniń «Qyzylorda» kartınasyna jan bitirdi

QYZYLORDA. KAZINFORM – S.Aıtbaev atyndaǵy Qyzylorda kórkemsýret galereıasynyń qoryndaǵy kartınalardyń birine jasandy ıntellekt jan bitirdi.

Ol – oraldyq sýretshi Nurbek Járdemovtiń «Qyzylorda» atty týyndysy. Kartınada 1925 jyly Aqmeshit ataýy Qyzylorda bolyp ózgerip, astana mártebesin alǵan sezge qatysý úshin depýtattar mingen poıyzdyń vokzalǵa kelý sáti beınelengen.

Aıta keteıik, 1925 jyly 15 sáýirde Aqmeshit qalasynda Qazaq AKSR keńesteriniń V sezi ashyldy. 19 sáýir kúni kún tártibindegi eki másele boıynsha sheshim qabyldandy. Birinshiden, ultymyzdyń «qazaq» ataýy qaıtarylsa, ekinshiden, Aqmeshit ataýy Qyzylorda bolyp aýysty.

– Sýretshi el astanasynyń Orynbordan Qyzylordaǵa kóship kelý kezindegi vokzaldaǵy qarbalasty sátti bere alǵan. Qazir áleýmettik jeli, jasandy ıntellekt keńinen qoldanysta. Soǵan baılanysty biz de kelýshilerdi qyzyqtyrý úshin kartınaǵa JI kómegimen qımyl-qozǵalys berip, sol sáttiń kórinisin jandy túrde jetkizgimiz keldi, – dedi galereıa ónertanýshysy Aıdana Erbol.

Ótken jyly Qyzylorda qalasynda Syr eliniń tarıhyna arnalǵan halyqaralyq sýretshiler sımpozıýmy ótken bolatyn. Bıyl galereıada Qyzylordanyń astana bolǵanyna 100 jyl tolýyna oraı sımpozıým kórmesi uıymdastyryldy. «Qyzylorda» kartınasy da kórme barysynda kelýshiler nazaryna usynyldy.

Al 18 sáýir kúni Qyzylordada ataýly mereıtoıǵa oraı Qazaqstan Sýretshiler odaǵy Túrkistan fılıaly sýretshi-keskindemeshileriniń «Keme» atty jyljymaly kórmesi ashylady.

Kórme ekspozıtsııasyna Túrkistan oblysynda ornalasqan kıeli oryndardy, tylsym tabıǵat kórinisterin, halyqtyń turmys-tirshiligin, salt-dástúrin, oblystyń órkendeý jolyn sıpattaıtyn 70-ten astam keskindemelik shyǵarma usynylady. Ekspozıtsııa mamyr aıynyń 15-ne deıin jalǵasady.

Al buǵan deıin biz el astanasy Orynbordan Qyzylordaǵa kóshkende jetken tarıhı ústel týraly jazǵanbyz.