JI olımpıadasyna qatysatyn balalardyń mıllıarder bolý múmkindigi 1,5 myń ese joǵary – Baǵdat Mýsın
ASTANA. KAZINFORM – Astanada ótetin jasandy ıntellekt boıynsha halyqaralyq IOAI-2026 olımpıadasy bolashaq tehnologııalyq kóshbasshylar men kásipkerlerdi tárbıeleýge yqpal etedi. Bul týraly Qazaqstannyń sporttyq baǵdarlamalaý federatsııasynyń (CPFed) prezıdenti Baǵdat Mýsın málimdedi.
Onyń aıtýynsha, olımpıada tapsyrmalary qatysýshylarǵa jasandy ıntellektiniń naqty ómirde qalaı qoldanylatynyn túsinýge múmkindik beretin praktıkalyq keısterge negizdelgen.
— Máselen, radıosıgnaldardy óńdeý, kedergilerdi anyqtaý, bólmedegi zattardyń ornalasýyn aıqyndaý sııaqty tájirıbelik tapsyrmalar bar. Mundaı keıster balalarǵa jasandy ıntellektiniń qalaı jumys isteıtinin jáne ony is júzinde qalaı qoldanýǵa bolatynyn túsinýge kómektesedi. Osyndaı jarystarǵa qatysatyn oqýshylar keleshekte tabysty startaptar quryp, tehnologııalyq jobalardy iske asyryp, ǵylymı zertteýlermen aınalysyp, tehnologııalyq kásipkerge aınalýy múmkin, – dedi Baǵdat Mýsın.
Federatsııa basshysy mundaı zııatkerlik jarystardyń qatysýshylardyń bolashaq mansabyna áserin kórsetetin statıstıkany keltirdi.
— Osyndaı olımpıadalarǵa qatysýshylardyń mıllıarder ári iri tehnologııalyq kásipker ataný múmkindigi 1,5 myń ese joǵary. Sonymen qatar olardyń JI, baǵdarlamalaý jáne kompıýterlik ǵylymdar salasynda ǵylymı jańalyq ashý yqtımaldyǵy 4 myń ese kóp, – dedi ol.
Onyń pikirinshe, IOAI-2026 olımpıadasyn ótkizý Qazaqstan úshin strategııalyq turǵyda mańyzdy.
— Bul Qazaqstan úshin halyqaralyq olımpıada ótkizip, ózin uıymdastyrýshy el retinde tanytý múmkindigi ǵana emes. Bul – memlekettiń jasandy ıntellektini damytýǵa aıryqsha mán beretinin kórsetedi. Bizdiń oqýshylar JI Qazaqstannan tys jerde ǵana jasalatyn dúnıe emestigin, óz elimizde de álemniń eń myqty komandalarymen teń dárejede jarysýǵa bolatynyn kórýi kerek, – dep atap ótti B. Mýsın.
Qatysýshylardyń jumystaryn halyqaralyq qazylar alqasy baǵalaıdy. Onyń quramyna ártúrli elden kelgen 14 sarapshy engen.
Sporttyq baǵdarlamalaý federatsııasynyń prezıdenti IOAI-2026 – kommertsııalyq baıqaý emestigin eske saldy. Sondyqtan uıymdastyrýshylar jeńimpazdarǵa aqshalaı syılyq qarastyrmaǵan.
Qatysýshylardy marapattaý máselesin ár memleket derbes uıǵarymmen sheshedi.
— Qazaqstan quramasynyń múmkindigin naqty boljaý qıyn. Óıtkeni JI olımpıadasy salystyrmaly túrde jaqynda paıda boldy jáne áli de qalyptasý kezeńinde. Munda fızıka, matematıka nemese ınformatıka olımpıadalaryndaǵydaı ondaǵan jyldyq tájirıbe joq. Soǵan qaramastan, byltyr bizdiń komanda jalpykomandalyq esepte tórtinshi oryn aldy. Ol kezde olımpıadaǵa shamamen 40 el qatyssa, bıyl olardyń sany júzden asty, – dedi Baǵdat Mýsın.
Aıta keteıik, jasandy ıntellekt boıynsha halyqaralyq IOAI-2026 olımpıadasy Astanada 2-8 tamyz aralyǵynda ótedi.
Elimizde jasandy ıntellekt pen startapty damytý boıynsha halyqaralyq ınnovatsııalyq hab qurylady.
