JI muǵalimniń kómekshisine aınaldy ma
ASTANA. KAZINFORM – Qazaqstandyq ustazdar bilim berýdiń dástúrli tásilderimen shektelmeı, zamanaýı tehnologııalardy belsendi qoldana bastaǵan. Bul týraly Jibek Joly telearnasynyń «Búgin Live» baǵdarlamasynda aıtyldy.
Osyndaı tásildi óz tájirıbesinde qoldanyp júrgen ustazdardyń biri — Qambar Rahmet. Ol Astanadaǵy M. Dýlatuly atyndaǵy № 68 mektep-gımnazııasynda jumys isteıdi.
— «Pedagog-kreator» retinde damyp otyrýǵa tyrysamyn. Kórkem eńbek sabaǵyn shyǵarmashylyq jobalarmen jáne jasandy ıntellekt múmkindikterimen ushtastyramyn, — dedi ol.
Mundaı izdenis ustazdyń kásibı jetistikterinen de kórinis tapqan. Atap aıtqanda, Qambar Rahmet osy eńbeginiń nátıjesinde «Eń kóp jetistikke jetken muǵalim» atalymyna ıe bolǵan. Al tájirıbesin odan ári jetildirý maqsatynda jýyrda arnaıy joldama jeńip alyp, Koreıada taǵylymdamadan ótip qaıtty.
Sheteldik tájirıbemen tanysyp, zamanaýı bilim berý tásilderin zerdeleý ustaz úshin jasandy ıntellektini oqý úderisinde tıimdi paıdalanýdyń mańyzyn tereń túsinýge múmkindik bergen. Onyń pikirinshe, tehnologııanyń basty artyqshylyǵy — muǵalimdi almastyrý emes, kerisinshe onyń múmkindigin keńeıtip, oqý úderisin jańa deńgeıge shyǵarýǵa kómektesý.
— Jasandy ıntellekt — bilim sapasyn arttyrýǵa, ustaz eńbegin jeńildetýge jáne jańa múmkindikterge jol ashatyn zamanaýı qural. Qýantatyny, mektep ustazdary muny túsinip, bilim berýdegi jańa tehnologııalardy meńgerýge umtylýda, — dedi spıker.
Eske salaıyq, Qazaqstan JI zańnamasyn qaıta qaraýy múmkin.
