JI muǵalimdi almastyrmaıdy: 500 aýyl mektebinde jańa tehnologııalar synaqtan ótedi
ASTANA. KAZINFORM – Jańa oqý jylynan bastap Qazaqstannyń barlyq óńirindegi 500 shaǵyn mektepte jasandy ıntellekt tehnologııalary engiziledi. Osylaısha JI muǵalimderdiń aptasyna 12 saǵatyn únemdeýge múmkindik beredi. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda aıtty.
Mınıstrdiń aıtýynsha, jańa oqý jylynan bastap Qazaqstannyń barlyq óńirindegi 500 shaǵyn jınaqty mektepte JI tehnologııalaryn engizý boıynsha pılottyq joba iske qosylady. Joba professor Kaıfý Lıdiń usynysy negizinde júzege asyrylmaq.
– Bizdiń esepteýimizshe, jasandy ıntellekt tehnologııalary muǵalimderimizdiń aptasyna 12 saǵatqa deıingi ýaqytyn únemdeıdi. Bul ýaqytty ustazdarymyz balalarmen jeke jumysqa, bilimdegi olqylyqtardy toltyrýǵa, sonymen birge qabiletin damytýǵa jumsaýǵa tıis, – dep atap ótti mınıstr.
Bul rette jasandy ıntellekt muǵalimniń ornyn almastyrmaı, oǵan qoldaý kórsetýi qajet.
– Bizdiń ustanymymyz aıqyn: jasandy ıntellekt muǵalimdi almastyrmaıdy, ol tek qana muǵalimniń kásibı múmkindigin arttyrýǵa kómekshi bolyp qala beredi. Jańa tehnologııa da bilim sapasyn ózdiginen arttyra almaıdy. Sondyqtan bıyl memlekettik standarttar, oqý baǵdarlamalary jáne oqý-ádistemelik keshenderi júıeli túrde zerdelendi, – dedi J. Súleımenova.
Qazaqstanda alǵash ret 1-11 synyptarǵa arnalǵan barlyq qoldanystaǵy oqýlyqtar men oqý-ádistemelik keshender tolyq saraptamadan ótken.
Zertteý nátıjesinde oqý materıaldarynyń tórtten birinen astamy eskirgeni anyqtalǵan. Osyǵan baılanysty oqýlyqtardy kezeń-kezeńimen jańartý jáne olardy baǵalaýdyń úsh deńgeıli jańa saraptama júıesin engizý qolǵa alynyp otyr.
– Jalpy biz jattaýǵa negizdelgen bilimnen oılanýǵa jáne sol alǵan bilimdi qoldanýǵa úıretýge kóshetin bolamyz. Osy tusta Ózińiz únemi nazarda ustaıtyn kitap oqý mádenıetiniń mańyzy artyp kele jatqandyǵyna erekshe toqtalǵym keledi. Jasandy ıntellekt jalpy jyldamdyq beredi, al kitap bizge tereń oılaý jáne tereń bilim beredi. Bilim júıesiniń basty mindeti – kitap oqýdy jáne jasandy ıntellektini durys úılestirý, – dep túıindedi Juldyz Súleımenova.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
