JI muǵalimdi almastyra almaıdy, ol tek qural ǵana – mınıstrlik
ASTANA. KAZINFORM – Astanada tórtinshi ret ǵylymı-tanymdyq PRO.NRG Fest 2025 festıvali ótip jatyr. Oǵan 6 myńnan astam qatysýshy – pedagogter, zertteýshiler, oqýshylar jáne olardyń ata-analary jınaldy. Aýqymdy festıvaldi «Caravan of Knowledge» korporatıvtik qory men «Shevron» kompanııasy uıymdastyrǵan, dep habarlaıdy Kazinform tilshisi.
Oqý-aǵartý mınıstrligi Orta bilim komıtetiniń tóraǵasy Qanybek Jumashevtyń aıtýynsha, ǵylym men tehnologııany damytý – Qazaqstandaǵy bilim berý júıesiniń strategııalyq basymdyǵy bolyp otyr.
– El Prezıdenti bilim berý protsesine tsıfrlyq tehnologııalar men jasandy ıntellektini jedel engizýdi tapsyrǵan bolatyn. Qazir pedagogtar aldynda jasandy ıntellektini meńgerý mindeti tur. Qazirdiń ózinde 200 myńnan astam muǵalim ony qoldaný boıynsha oqýdan ótti. Jańa oqý jylynan bastap JI oqý protsesine engiziledi. Osyndaı is-sharalar muǵalimderge jańa tásilderdi tájirıbege jyldam endirýge kómektesedi, - dedi komıtet basshysy festıvaldiń ashylýynda.
Q. Jumashev jasandy ıntellekt eshqashan pedagogty, onyń ıdeıasy men jańashyldyǵyn almastyra almaıtynyn erekshe atap ótti.
– Ol tek oqý-tárbıe protsesiniń tıimdiligin arttyrý quraly retinde ǵana paıdalanylady. Sondyqtan biz JI-di bilim berý isine engizgende eń aldymen etıkalyq normalarǵa mán beremiz. Muǵalimder oılap tabýdan, zertteýden qol úzbeýi kerek, - dedi Qanybek Jumashev.
JI-diń bilim berýdegi róline toqtalǵan sarapshylar tehnologııalardy qoldanýdyń praktıkalyq qyrlaryn jáne onyń ákeletin jańa syn-qaterlerin talqylady.
– Bilim salasyndaǵy jasandy ıntellekt muǵalimdi almastyra ma, joq pa degen suraq emes, ony qoldaný mádenıeti týraly máseleni qozǵap otyr. Qazir eń bastysy – mektepte JI qalaı qoldanylýy kerek degen erejelerdi qalyptastyrý. Ol oılaýdy kúsheıtýge baǵyttalýy kerek, almastyrýǵa emes, - deıdi JI boıynsha jattyqtyrýshy Aıda Ábilákimova.
Festıvaldiń bıylǵy taqyryby – Rooted in the Future («Bolashaqqa tamyr
jaıý»). Ol «Bilim aǵashy» metaforasyna negizdelgen: tamyr – ótken dástúrdi, aǵash dińgegi – zamanaýı bilim berýdi, al butaqtary – jańa tehnologııalar men tásilderdi bildiredi.
Festıval baǵdarlamasyna 30-dan astam dáris, master-klass, AI-praktıkým, ǵylymı kvestter men digital-aımaqtar engen. Qatysýshylar geımıfıkatsııa arqyly tapsyrmalardy oryndap, upaı jınap, olardy júldege aıyrbastap, oqýdy qyzyqty protsess retinde qabyldady.
Festıval tórt sektsııaǵa bólingen. USTAZ sektsııasynda pedagogtyń negizgi róli men zamanaýı syn-qaterler talqylandy. Ǵylymı-tanymdyq blokta arheologııa, ekologııa jáne tarıh boıynsha dárister usynyldy.
Sonymen birge, festıval aıasynda pedagogtarǵa arnalǵan Science on Stage eýropalyq konkýrsynyń ulttyq kezeńi ótti. Onda iriktelgen jeti joba 2026 jyly Lıtvada Qazaqstan atynan usynylady.
Aıta keteıik, elimizde Jasandy ıntellekt jáne tsıfrlyq damý mınıstrligi quryldy.
Sondaı-aq Qazaqstan jasandy ıntellektini bilim berý júıesine engizýdiń ulttyq modelin bekitti.