JI men tsıfrlyq protsester Astana turǵyndaryna qyzmet kórsetýdi qalaı jeńildetedi
ASTANA. KAZINFORM –Búginde jasandy ıntellekt modýlderi elorda ómirin qamtamasyz etetin barlyq salaǵa belsendi túrde engizilýde, dep habarlaıdy ákimdiktiń resmı saıty.
Turǵyn úı-kommýnaldyq sharýashylyqtaǵy tsıfrlandyrý jáne qalalyq qyzmetterdiń jumysy týraly Astana qalasy Tsıfrlandyrý jáne memlekettik qyzmetter basqarmasynyń basshysy Berik Ahmetov qalalyq kommýnıkatsııalar qyzmetinde ótken brıfıngte aıtty.
Qazirgi tańda elordada qatty turmystyq qaldyqtardy jınaý protsesi tolyq tsıfrlandyryldy. Operatorlardyń jumysy GPS-monıtorıng jáne fotofıksatsııa júıesi arqyly naqty ýaqyt rejıminde baqylanyp otyr. Sonyń nátıjesinde qoqys shyǵarý boıynsha shaǵymdar aptasyna 200-den 2-ge deıin azaıdy. Sonymen birge qoqys shyǵarý kelisimsharty joq 289 myńnan astam nysan anyqtaldy. Qazir olardy kezeń-kezeńimen júıege qosý jumysy júrip jatyr.
«Qoqys alańdary men polıgondardyń tsıfrlyq kartasy jasaldy: ár oryn baqylaýda, al zańbuzýshylyqtar avtomatty túrde tirkeledi. Sondaı-aq qurylys qaldyqtaryn baqylaýǵa arnalǵan arnaıy modýl engizildi. Bul júıe qaldyqtardyń kólemin, tasymal marshrýtyn jáne merdigerlerdi mindetti túrde tirkeýdi talap etedi», – dedi Berik Ahmetov.
Sonymen qatar turǵyndar men qala qonaqtarynyń qolaılylyǵy úshin qalalyq qyzmetterdiń jumysyna tsıfrlyq servıster engizilgen. Qala turǵyndary men qyzmetter arasyndaǵy baılanysty qamtamasyz etetin biryńǵaı baılanys ortalyǵy iKOMEK109, sondaı-aq «bir tereze» qaǵıdaty boıynsha 120-dan astam kommýnaldyq jáne basqa da qyzmet túrin usynatyn QalaQyzmet ortalyǵy tıimdi jumys istep tur.
Elordada turǵyndarǵa tsıfrlyq qyzmetterge turaqty ári jyldam qoljetimdilikti qamtamasyz etý úshin baılanys ınfraqurylymyn jańǵyrtý jalǵasýda. Búginde barlyq 16 turǵyn alaby men 1 saıajaı massıvi joǵary jyldamdyqty ınternetke (100-den 500 Mb/s-qa deıin) qosylǵan. 12 myńnan astam jeke úıge talshyqty-optıkalyq jeli tartyldy.
«Sonymen birge baılanys sapasy tómen aımaqtardy («aq daqtardy») joıý jumysy júrgizilýde. 35 aımaqtyń 28-i turaqty sıgnalmen qamtyldy, jyl sońyna deıin qosymsha 10 antenna-machtalyq qurylǵy ornatylmaq (qazirdiń ózinde 52 AMS ornatyldy). Qala aýmaǵynda 300-den astam 5G bazalyq stantsııasy jumys isteıdi, bul ınternet jyldamdyǵyn arttyryp, baılanys turaqtylyǵyn qamtamasyz etedi. Buǵan qosa, bıyl jyl sońyna deıin qos maqsattaǵy 26 tirek ornatý josparlanyp otyr», – dedi B. Ahmetov.
Innovatsııalar salasynda Astanada jasandy ıntellekt negizindegi sheshimderdi júıeli túrde engizýge baǵyttalǵan biryńǵaı ınfraqurylym – AI-Lab qurý jumystary júrip jatyr.
Bastamanyń maqsaty – ıdeıany qalyptastyrýdan bastap qalalyq derekterge qol jetkizýge, akseleratsııaǵa, testileýge jáne sheshimderdi keńeıtýge deıin ınnovatsııalardyń tolyq tsıklin qamtamasyz etý. Qatysýshylar Microsoft, Google, NVIDIA, AWS jáne basqa da iri halyqaralyq kompanııalardan qoldaý alyp, bultty esepteýlerge jáne qalalyq API-lerge qol jetkize alady, sondaı-aq ýnıversıtetter men sarapshylardan mentorlyq kómek kórsetiledi.
Aıta keteıik, jasandy ıntellekt jol sapasyn baqylaıdy.