JI men tsıfrlandyrý: munaı-gaz salasynda aldaǵy jyldary qandaı mamandarǵa suranys artady
ASTANA. KAZINFORM – Qazaqstannyń munaı-gaz salasynda tsıfrlandyrý, avtomattandyrý, jasandy ıntellekt pen robottandyrýdyń damýyna baılanysty mamandarǵa qoıylatyn talaptar ózgerip jatyr. Aldaǵy ýaqytta kásibı bilimin tsıfrlyq daǵdylarmen ushtastyra alatyn kadrlarǵa qajettilik artady. Bul týraly QR Energetıka mınıstrligi Kazinform agenttiginiń resmı saýalyna bergen jaýabynda aıtty.
Mınıstrliktiń málimetinshe, qazir munaı-gaz salasynda óndiristik jáne ınjenerlik-tehnıkalyq mamandarǵa suranys bar.
Atap aıtqanda, tehnologııalyq qondyrǵylar operatorlary, elektr monterleri, elektr gazymen dánekerleýshiler, jabdyqtardy jóndeý jáne qyzmet kórsetý slesarlary qajet. Sonymen qatar ınjener-tehnologter, ınjener-mehanıkter, energetıkter, avtomattandyrý jáne baqylaý-ólsheý aspaptary boıynsha mamandarǵa suranys bar.
– Geologııalyq barlaý baǵytynda da mamandarǵa qajettilik saqtalyp otyr. Olardyń qatarynda geologter, geofızıkter, petrofızıkter, sedımentologter jáne seısmıkalyq barlaý mamandary bar. Alaıda jańa tehnologııalardyń engizilýine baılanysty saladaǵy mamandarǵa qoıylatyn talaptar da birtindep ózgerip keledi. Mınıstrliktiń málimetinshe, tsıfrlandyrý, avtomattandyrý, jasandy ıntellekt pen robottandyrý jańa mamandyqtardyń paıda bolýyna ǵana emes, qazirgi ınjenerlik jáne jumysshy kásipterdiń ózgerýine de áser etedi, - delingen mınıstrlik jaýabynda.
Aldaǵy ýaqytta tehnologııa, mehanıka, energetıka, geologııa nemese jabdyqtardy paıdalaný salasyndaǵy kásibı bilimin tsıfrlyq daǵdylarmen jáne avtomattandyrylǵan óndiristik júıelermen jumys isteý qabiletimen ushtastyra alatyn mamandarǵa suranys artady.
Sonyń ishinde ónerkásiptik avtomatıka, tsıfrlyq modeldeý, óndiristik derekterdi taldaý jáne jasandy ıntellekt baǵytyndaǵy mamandar qajet bolady. Buǵan qosa boljamdy dıagnostıka, ónerkásiptik kıberqaýipsizdik, mehatronıka, tehnıkalyq tutastyqty basqarý, energııa tıimdiligi jáne resýrsty únemdeý salalaryndaǵy kadrlarǵa qajettilik artady.
– Geologııa salasyndaǵy talaptar da ózgeredi. Ken oryndarynyń tsıfrlyq modelderimen, arnaıy baǵdarlamalarmen jáne kúrdeli kollektorlarmen jumys isteı alatyn mamandardyń mańyzy arta túsedi. Munaı-gaz óńdeý jáne gaz hımııasy salasynda da jańa baǵyttar boıynsha kadrlar qajet. Mınıstrlik gaz hımııasy, óndiristik ınjınırıng, pırolız jáne polımerleý salasyndaǵy mamandardy atap otyr. Sonymen qatar jańa tsıfrlyq óndiristerdi salý jáne iske qosý tájirıbesi bar joba menedjerlerine de qajettilik bolady, - delingen jaýapta.
Vedomstvonyń habarlaýynsha, bul qajettilik gaz hımııasyn damytýmen, munaı óńdeý jáne jańa gaz óńdeý qýattaryn qurýmen, sondaı-aq «Qalamqas-teńiz» jáne «Hazar» kúrdeli teńiz ken oryndaryn ıgerýmen baılanysty.
Sondaı-aq mınıstrlik munaı-gaz salasyndaǵy tehnologııalyq ózgeristerdiń negizgi baǵyttarynyń biri – tsıfrlyq jáne adam qatysýyn barynsha azaıtatyn ken oryndaryna kóshý ekenin atap ótken. Sondaı-aq ken oryndary men munaı óńdeý zaýyttarynyń tsıfrlyq modelderin jasaý, óndiristik protsesterdi avtomattandyrý jáne jabdyqtardy qashyqtan basqarý kózdelgen.
– Budan bólek, óndiriste ushqyshsyz ushý apparattaryn, ónerkásiptik zattar ınternetin, úlken derekterdi taldaý, mashınalyq oqytý jáne jasandy ıntellekt tehnologııalaryn qoldaný qarastyrylǵan, - delingen.
Osy ózgeristerge baılanysty munaı-gaz salasynda tek belgili bir mamandyqty meńgerý jetkiliksiz bola túsedi. Mınıstrliktiń jaýabynda kásibı bilimdi tsıfrlyq daǵdylarmen jáne avtomattandyrylǵan óndiristik júıelermen jumys isteý qabiletimen ushtastyra alatyn mamandarǵa suranys joǵary bolatyny aıtylǵan.
