JI mektep baǵdarlamasyn qalaı ózgertti – pedagog
ASTANA. KAZINFORM – Búgingi tańda jasandy ıntellekt tek ІT mamandarynyń quraly bolýdan qalyp, mektep synyptaryna jańashyldyq ákelgen bilim berýdiń ajyramas bóligine aınaldy. Ásirese tsıfrlyq dáýirde týǵan alfa urpaǵymen til tabysýda jańa tehnologııalardy tıimdi paıdalanatyn ustazdar kósh bastap tur. Pedagogıkalyq ınnovatsııa sheberhanasy qalalyq baıqaýynyń jeńimpazy, qazaq tili men ádebıeti pániniń muǵalimi Farıza Mannap Jibek Joly telearnasynyń «Búgin.LIVE» baǵdarlamasyna zamanaýı formatqa kóshirýdiń jáne JI kómegimen daıyndaǵan erekshe sabaqtarynyń syrymen bólisti.
Áleýmettik jelidegi 15 sekýndtyq qysqa vıdeolarǵa úırengen qazirgi oqýshylarǵa 45 mınýt boıy sabaq berý muǵalimder úshin ońaıǵa túspeı tur. Osy oraıda, Farıza Mannap bıylǵy oqý jylynda sabaq protsesine jasandy ıntellektini belsendi engize bastaǵanyn aıtady.
– Qazirgi urpaqqa áleýmettik jelidegi 15 sekýndtyq vıdeo da qyzyq bolmaı qalǵan. Al oılańyz, biz úshin 45 mınýt olarǵa sabaq túsindirý, belgili bir dúnıeni úıretý – shynymen aýyr jumys. Sondyqtan bıylǵy jyldyń basty artyqshylyǵy da sol, JI qoldanýmen erekshe bolyp otyr. Biz ony sabaqqa deıingi protseste de, sabaq ústinde de shyǵarmashylyq qural retinde birge qoldanamyz. JI oqýshylardyń ishindegi shyǵarmashylyq qabiletterin ashýda, ózderiniń jasampaz tulǵa retinde qalyptasýyna kómektesip jatyr, - deıdi ol.
Ustazdyń aıtýynsha, JI quraldary ásirese synyptaǵy erekshe kóńil bólýdi qajet etetin nemese úlken mátinderdi qabyldaýy qıyn balalarmen jumys isteýde taptyrmas kómekshige aınalǵan.
Kólemdi shyǵarmalardy avtordyń kórkem tilin saqtaı otyryp, JI kómegimen vızýaldy «storıbýk» (sýretti kitapsha) retinde beınelep berýdiń arqasynda oqýshylardyń sabaqqa degen qulshynysyn artqan. Máselen, ádebıet sabaǵynda keıipkerlermen vırtýaldy hat almasý ádisi oqýshylarǵa erekshe áser etken.
– Jaqynda 10-synyp oqýshylarymen «Beseýdiń hatyn» óttik. Ol – óte aýyr shyǵarma. Sol kezdegi ashtyq, qıyn kúnderdi, árıne, beıbit kúnde otyrǵan urpaq tolyq túsine almaýy múmkin. Balalar shyǵarma keıipkerine, avtorǵa hat jazdy. Keıin JI arqyly árkim ózine sol keıipkerdiń atynan jaýap hat aldy. Tek shyǵarmany oqyǵan azdyq etedi eken, al keıipkerdiń jaýaby kelgen kezde, hatty oqyp otyryp kózderine jas alǵan oqýshylar boldy. Qazir ondaı múmkindik bar kezde, nege jańa formattardy qoldanbasqa, - dedi muǵalim.
Osy oraıda Farıza Mannap negizinen Gemini jáne NotebookLM platformalaryn turaqty qoldanatynyn aıtady. Balalardyń bul ádiske degen keri baılanysy óte joǵary ekenin baıqaǵan.
Alaıda ustaz jasandy ıntellektiniń qaýipti tustaryna da toqtalyp, balalarǵa tsıfrlyq saýattylyqty úıretý mańyzdy ekenin atap ótti.
– JI bizdiń oń qolymyzǵa, kómekshimizge aınaldy. Biraq ony tek qural, tehnologııa retinde qabyldap, oqýshylarǵa JI-di saýatty qoldanýdy úıretýimiz kerek. Olar jyl basynda JI-ge daıyn jaýapty jazdyryp, kóshirip kelýge daıyndalatyn. Qazir kózqarastary ózgerdi, - dep túıindedi Farıza Mannap.
Eske sala keteıik, jaqynda Memleket basshysynyń orta mektepterge jasandy ıntellektini engizý týraly Jarlyqqa qol qoıǵan edi.
Buǵan deıin, astanalyq mektep oqýshylary qarttar men dárigerlerge kómektesetin JI-robottary jaıly jazǵan bolatynbyz.
