JI kómir qoryn esepteý ýaqytyn 10 kúnnen 20 mınýtqa qysqartty
ASTANA. KAZINFORM — Jasandy ıntellekt elektr stantsııalaryndaǵy aqaýlardy erte anyqtaýǵa kómektesedi, dep habarlaıdy Energetıka mınıstrliginiń baspasóz qyzmeti.
Jasandy ıntellekt óndiristik qaýipsizdikti kúsheıtedi
«Samuryq-Energo» AQ-nyń tsıfrlyq transformatsııasy aıasynda jasandy ıntellekt tehnologııalaryn óndiristik qyzmettiń negizgi baǵyttaryna engizý jumystary júrgizilip jatyr.
Tehnologııalyq sheshimder óndiristik qaýipsizdikti qamtamasyz etý, jabdyqtardyń tehnıkalyq jaı-kúıin dıagnostıkalaý, energetıkalyq ınfraqurylymdy baqylaý jáne elektr energııasyn óndirý kólemin boljaý maqsatynda qoldanylady.
— Kompanııa nysandarynda engizilip jatqan sheshimderdiń biri — ıntellektýaldy beınebaqylaý júıesi. Ol beınekameralardan túsetin aqparatty naqty ýaqyt rejıminde taldap, eńbek qaýipsizdigi talaptarynyń saqtalýyn baqylaýǵa múmkindik beredi. Atap aıtqanda, júıe jeke qorǵanys quraldarynsyz júrgen qyzmetkerlerdi, qaýipti áreketterdi jáne qaýipti aımaqtarǵa kirý jaǵdaılaryn avtomatty túrde anyqtaıdy. Bul óndiristegi yqtımal táýekelderdi jedel anyqtap, tıisti sharalardy ýaqytyly qabyldaýǵa múmkindik beredi, — delingen habarlamada.
JI jabdyqtardyń aqaýyn aldyn ala anyqtaıdy
Jasandy ıntellektini qoldanýdyń taǵy bir mańyzdy baǵyty — jabdyqtardyń tehnıkalyq aqaýlaryn aldyn ala anyqtaý.
Ekibastuz MAES-1-de mashınalyq oqytý tehnologııalary negizinde aqaýlardy anyqtaý jobasy iske asyrylyp jatyr. Júıe jabdyqtyń burynǵy jáne aǵymdaǵy jumys kórsetkishterin saralap, qalyptan tys ózgeristerdi anyqtaıdy. Osylaısha yqtımal aqaýlardy erte kezeńde baıqap, jabdyqtyń isten shyǵý qaýpin tómendetýge jáne jospardan tys toqtaýlardyń aldyn alýǵa múmkindik beredi.
Drondar energetıkalyq nysandardy tekseredi
Energetıkalyq ınfraqurylymdy baqylaýda ushqyshsyz ushý apparattary men kompıýterlik kórý tehnologııalary da keńinen qoldanylyp keledi. Drondar nysandardy joǵarydan túsirip, alynǵan beıne jáne jylý túsirilimderin jasandy ıntellekt kómegimen taldaıdy. Bul tásil aqaýlardy jedel anyqtaýmen qatar, qyzmetkerlerdi bıiktikte atqarylatyn qaýipti jumystarǵa tartý qajettiligin azaıtady.
— Jasandy ıntellekt tehnologııalaryn qoldaný birqatar óndiristik operatsııalardyń oryndalý ýaqytyn qysqartýǵa múmkindik beredi. Atap aıtqanda, kómir qorlarynyń kólemin esepteý merzimi 10 kúnnen 20 mınýtqa deıin qysqardy. Elektr berý jelilerin, tirekter men transformatorlardy tekserý ýaqyty 5–10 esege azaıady. Tútin murjalaryn tekserý kezinde drondardy paıdalaný ınspektsııany eki saǵatqa deıin oryndaýǵa múmkindik beredi, — deıdi mamandar.
Sonymen qatar gıdrotehnıkalyq qurylystardyń jaı-kúıin baqylaý kezinde aerotúsirilim nátıjelerin taldaý arqyly yqtımal zaqymdardy ýaqtyly anyqtaý múmkindigi qarastyrylǵan.
Elektr energııasyn óndirý kólemi aldyn ala boljanady
Jasandy ıntellektini qoldanýdyń taǵy bir baǵyty — jańartylatyn energııa kózderinen óndiriletin elektr energııasyn boljaý. Júıe generatsııa kólemin 24–72 saǵat buryn boljaý úshin meteorologııalyq derekterdi, sondaı-aq avtomattandyrylǵan kommertsııalyq esepke alý júıesi (ASKÝE) men SCADA júıesinen alynatyn aqparatty paıdalanady.
Bul sheshimderdiń tıimdiligi jel elektr stantsııalary úshin erekshe mańyzdy. Jel elektr stantsııalaryndaǵy generatsııa kólemi aýa raıy jaǵdaılaryna, onyń ishinde jeldiń jyldamdyǵyna tikeleı baılanysty. Jobanyń maqsaty — elektr energııasyn óndirý kólemin boljaý dáldigin 80%-ǵa deıin arttyrý, operatsııalyq josparlaý sapasyn jaqsartý jáne naqty generatsııa kóleminiń boljamdy kórsetkishterden aýytqýyn tómendetý.
Aıta keteıik, jasandy ıntellekt tehnologııalaryn óndiristik protsesterge engizý «Samuryq-Energo» AQ-nyń óndiristik qaýipsizdigin arttyrýǵa, energetıkalyq jabdyqtardyń senimdiligin qamtamasyz etýge, ınspektsııalyq jumystardyń tıimdiligin arttyrýǵa jáne energetıkalyq aktıvterdi basqarý sapasyn jaqsartýǵa baǵyttalǵan.
Buǵan deıin jasandy ıntellektini meńgergen mamandar 62 paıyzǵa kóp tabys tabatynyn jazǵanbyz.
