JI kómegimen JEK generatsııasyn boljaý dáldigi 80%-ǵa deıin artady
ASTANA. KAZINFORM – «Samuryq-Energo» AQ jańartylatyn energetıka nysandarynda elektr energııasyn óndirýdi josparlaý úderisterin tsıfrlandyrý jobasyn júzege asyryp jatyr. Jasandy ıntellekt pen mashınalyq oqytýǵa negizdelgen sheshimdi 2026 jyldyń sońynda iske qosý josparlanyp otyr.
Energetıka mınıstrligi málimetinshe, boljaý dáldigi jel generatsııasy nysandary úshin erekshe mańyzdy. Óıtkeni óndiriletin elektr energııasynyń kólemi meteorologııalyq jaǵdaılarǵa tikeleı baılanysty. Atap aıtqanda, qubylyp turatyn ári boljaý qıyndyqqa túsetin jeldiń jyldamdyǵyna táýeldi.
Sheshimniń negizinde meteorologııalyq qyzmetpen ıntegratsııalanǵan jasandy ıntellekt modeli jatyr. Júıe jel elektr stantsııalarynda elektr energııasyn óndirýdi boljaýǵa qajetti keńistikte jáne ýaqytqa saı naqtylaı otyryp, meteorologııalyq derekterdi barynsha óńdeıtin bolady.
JI modelin oqytý jáne beıimdeý úshin elektr energııasyn kommertsııalyq esepke alýdyń avtomattandyrylǵan júıesi (EKEAJ) jáne SCADA júıelerinen alynǵan tarıhı ári jedel derekter — elektr energııasyn óndirýdiń naqty kórsetkishteri men jabdyq jumysynyń tehnologııalyq parametrleri paıdalanylatyn bolady.
Bul naqty paıdalaný jaǵdaılaryn eskerýge jáne generatsııany boljaý dáldigin 80%-ǵa deıin arttyrýǵa múmkindik beredi. Nátıjesinde operatsııalyq josparlaýdyń tıimdiligi artyp, naqty óndirilgen elektr energııasy kóleminiń málimdelgen kólemnen aýytqýyna baılanysty qarjylyq shyǵyndar azaıady.
Aıta keteıik, Qazaqstanda 2026 jylǵa josparlanǵan 10 JEK jobasynyń 7-eýi iske qosyldy.
