JI kómegimen qaterli isikti anyqtaǵan qazaqstandyq oqýshy marapattaldy
ASTANA. KAZINFORM – AQSh-tyń Phoenix qalasynda Regeneron ISEF 2026 dúnıejúzilik ǵylymı-ınjenerlik kórmesi aıaqtaldy. Álemdegi eń bedeldi ǵylymı dodaǵa bıyl 60-tan astam elden 1 700-ge jýyq jas zertteýshi qatysty.
Qazaqstan atynan 7 oqýshy bes ǵylymı jobany usynyp, el namysyn qorǵady. Baıqaý qorytyndysynda Taraz qalasyndaǵy Zııatkerlik mektebiniń 11-synyp oqýshysy Arnur Artyqbaı arnaıy júldelermen marapattaldy.
Ol «Mashınalyq oqytý negizinde qaterli isikterdi avtomatty túrde anyqtaý júıesi» atty ǵylymı jobasymen MAWHIBA Foundation qorynyń 400 dollar kólemindegi aqshalaı syılyǵyn jáne Saýd Arabııasynyń Korol Fahd atyndaǵy Munaı jáne paıdaly qazbalar ýnıversıtetine (KFUPM) bilim berý grantyn ıelendi. Joba jasandy ıntellekt tehnologııalaryn paıdalaný arqyly qaterli isikterdi erte ári dál anyqtaýǵa baǵyttalǵan.
Regeneron ISEF – mektep oqýshylary arasynda ótkiziletin álemdegi eń iri ǵylymı-ınjenerlik kórmelerdiń biri. Bul baıqaýdy halyqaralyq uıymdar men iri tehnologııalyq kompanııalar qoldaıdy. Solardyń qatarynda MAWHIBA Foundation qory bar. Bul qor Saýd Arabııasynda daryndy balalar men jas ǵalymdardy qoldaýǵa baǵyttalǵan jáne ǵylym, tehnologııa men ınnovatsııa salalaryndaǵy talanttardyń halyqaralyq deńgeıde damýyna jaǵdaı jasaıdy. Qazaqstan 1999 jyldan beri osy halyqaralyq baıqaýǵa ulttyq seriktes retinde turaqty qatysyp keledi. Qazaqstannyń qatysýy jastardyń ǵylymı-zertteý jumystaryna qoldaý kórsetý jáne halyqaralyq tájirıbe almasýǵa múmkindik beredi.
Eske sala keteıik, buǵan deıin astanalyq oqýshylar robototehnıkadan halyqaralyq chempıonatta úzdikterdiń qataryna engenin habarlaǵanbyz.
