JI keńsede otyryp qalǵandardy sportqa tartýdyń jolyn tapty

Keńse qyzmetkerlerin qozǵalysqa qalaı tartýǵa bolady?

Tsıfrlyq format kúni boıy keńsede otyryp jumys isteıtin adamdardy kóbirek qozǵalysqa tartýǵa, qyzmetkerler arasynda sporttyq chellendjder ótkizýge jáne nátıjelerdi avtomatty túrde tirkeýge múmkindik beredi. Bul tásil buqaralyq sportty damytý men halyqtyń dene belsendiligin arttyrýdyń jańa quraldarynyń birine aınalýy múmkin.

Qazirgi tańda kóptegen adamnyń jumys kúni kompıýter aldynda ótedi. Keńse qyzmetkeri tańerteń jumysqa kelip, birneshe saǵat boıy ornynan turmaı otyrýy múmkin. Jumystan keıin de sportzalǵa barýǵa ýaqyt nemese ynta árdaıym tabyla bermeıdi.

Nátıjesinde qozǵalys azaıady. Al halyqtyń densaýlyǵy tek ár adamnyń jeke máselesi emes. Adam aýyrsa, jumysqa shyqpaıdy, eńbekke ýaqytsha jaramsyzdyq paraǵyn alady. Bul jumys protsesine, eńbek ónimdiligine jáne jalpy ekonomıkaǵa áser etedi. Sondyqtan jumys isteıtin halyqty dene belsendiligine tartý buqaralyq sportpen qatar qoǵamdyq densaýlyq úshin de mańyzdy.

Osyndaı jaǵdaıda korporatıvtik sport úlken aýdıtorııany qamtýdyń bir joly bola alady. Óıtkeni eńbekke qabiletti adamnyń kúniniń edáýir bóligi jumys ornynda ótedi.

Alaıda qyzmetkerlerge fıtnes-klýbqa abonement berý nemese jylyna bir ret spartakıada ótkizý adamnyń turaqty túrde sportpen aınalysatynyn bildirmeıdi. Negizgi máseleniń biri — adamdy kún saıyn qozǵalysqa qalaı yntalandyrý kerek?

Qazaqstandyq AI SPORT jobasy bul máseleni jasandy ıntellekt pen oıyn elementteri arqyly sheshýdi usynady.

Platformada qyzmetker smartfon kamerasynyń aldynda otyryp-turý, ıterilip kóterilý jáne jalpy dene daıyndyǵyna arnalǵan basqa da bazalyq jattyǵýlardy oryndaı alady. Jasandy ıntellekt adamnyń qozǵalysyn tanyp, oryndalǵan qaıtalaýlardy sanaıdy jáne nátıjeni tirkeıdi.

Júrý, júgirý jáne velosıped tebý sııaqty belsendilikter GPS arqyly esepke alynady. Osylaısha adamnyń sportpen aınalysýy tek sportzalmen shektelmeıdi.

Sporttaǵy jarys qyzmetkerlerdi belsendi bolýǵa yntalandyra ala ma?

Korporatıvtik sporttaǵy mańyzdy quraldardyń biri — jarys elementi.

Máselen, bir kompanııanyń qyzmetkerleri bir aı ishinde kim kóp qadam jasaıtynyn, belgili bir jattyǵýdy kim kóbirek oryndaıtynyn nemese qaı bólimniń belsendiligi joǵary bolatynyn anyqtaıtyn chellendjge qatysa alady.

Bul jerde motıvatsııa tek aqshalaı syılyqpen shektelmeýi múmkin. Kompanııa úzdik qyzmetkerler men komandalardy marapattap, reıtıng júrgizip, kýbok, sertıfıkat nemese basqa da syılyqtar bere alady. Mundaı tásil qyzmetkerge óz nátıjesin kórýge jáne áriptesterimen birge ortaq maqsatqa qatysýǵa múmkindik beredi.

Materıaldyq yntalandyrý da qarastyrylýy múmkin: kompanııalar óz múmkindigine qaraı jeńimpazdarǵa syılyq, bonýs nemese basqa marapat usyna alady. Biraq tsıfrlyq formattyń negizgi maqsaty — adamdy bir rettik jarysqa emes, turaqty qozǵalysqa tartý.

Ulttyq tsıfrlyq jáne AI sport federatsııasynyń prezıdenti Ǵabıt Saltybaevtyń aıtýynsha, tehnologııa adamnyń ornyna sportpen aınalyspaıdy, biraq oǵan turaqty qozǵalysty ádetke aınaldyrýǵa kómektese alady.

— Basty mindet — adamdy qozǵalysqa yntalandyrý. Jarys pen tsıfrlyq tehnologııa sportty kúndelikti ádetke aınaldyrýǵa kómektesedi, — deıdi Ǵabıt Saltybaev.

Memleket úshin onyń mańyzy nede?

Tsıfrlyq korporatıvtik sporttyń aýqymyn tek bir kompanııanyń qyzmetkerlerimen shekteýge bolmaıdy. Eger mundaı baǵdarlamalar iri kásiporyndarda, memlekettik jáne jeke uıymdarda qoldanylsa, jumys isteıtin halyqtyń úlken bóligin qamtýǵa múmkindik paıda bolady.

Memleket úshin mundaǵy negizgi nátıje — halyqty sportpen aınalysýǵa tartýdyń qosymsha arnasyn qalyptastyrý.

Adamnyń sportzalǵa óz erkimen kelýin kútýdiń ornyna dene belsendiligin onyń kúndelikti ómirine — jumys ornyna, smartfonyna, áriptesterimen qarym-qatynasyna engizýge bolady.

Mundaı tásil sport ınfraqurylymyn almastyrmaıdy. Biraq ol sportzalǵa turaqty barmaıtyn nemese kásibı jattyqtyrýshymen aınalyspaıtyn adamdarǵa qarapaıym dene belsendiligin bastaýǵa múmkindik beredi.

Bul jerde ekonomıkalyq faktor da bar. Densaýlyǵy jaqsy jáne belsendi halyq eńbek naryǵy úshin mańyzdy. Al aýrýǵa baılanysty jumysqa shyqpaý tek adamnyń ózine emes, jumys berýshige jáne tutastaı eńbek protsesine áser etedi.

Sondyqtan korporatıvtik sportty tek kompanııa ishindegi tımbıldıng retinde emes, jumys isteıtin halyqtyń dene belsendiligin arttyrýdyń bir tetigi retinde qarastyrýǵa bolady.

Asyq pen láńgi de tsıfrlandyrylady

AI SPORT tehnologııasyn tek korporatıvtik jattyǵýlarǵa paıdalaný josparlanyp otyrǵan joq.

Jobanyń kelesi baǵyttarynyń biri — ulttyq sport túrleri men dástúrli oıyndardy tsıfrlyq ortaǵa engizý. Asyq atý, láńgi tebý jáne sadaq atý boıynsha jattyǵýlar, chellendjder men jarys formattaryn ázirleý qarastyrylǵan.

Ár baǵyt úshin jeke tsıfrlyq sheshim qajet. Keıbir jattyǵýlar naqty sporttyq qural-jabdyqtarmen oryndalsa, basqa tapsyrmalarda smartfon nemese planshet kamerasy adamnyń qozǵalysyn tanyp, oryndalǵan áreketterdi tirkeı alady.

Sonymen qatar ústel tennısi, boks, fýtbol jáne basketbol baǵyttaryndaǵy jattyǵýlardy tsıfrlandyrý josparlanyp otyr. Al otyryp-turý sııaqty jalpy dene daıyndyǵy jattyǵýlary ártúrli sport túrlerine qajetti bazalyq fızıkalyq daıyndyq retinde qoldanylady.

Ulttyq oıyndardy tsıfrlyq formatqa kóshirýdiń maqsaty — olardy vırtýaldy oıynmen almastyrý emes. Kerisinshe, tehnologııa arqyly adamdy naqty qozǵalysqa tartý, oıyn erejelerin úıretý, nátıjesin tirkeý jáne jarys uıymdastyrý kózdelgen.

Bul balalar men jastarǵa ulttyq sportty jańa formatta tanystyrýǵa, al bolashaqta qazaqtyń dástúrli oıyndaryn halyqaralyq aýdıtorııaǵa kórsetýge múmkindik beredi.

Osylaısha jasandy ıntellekt sportta tek kásibı nátıje úshin qoldanylatyn tehnologııa bolýdan qalyp, buqaralyq sporttyń quralyna aınala alady. Al onyń tıimdiligi qansha adamnyń qosymshaǵa tirkelgenimen emes, qansha adamnyń kúndelikti ómirinde kóbirek qozǵala bastaǵanymen ólshenbek.

Osyǵan deıin Qazaqstanda tsıfrlyq jáne AI-sport federatsııasy qurylǵanyn jazǵanbyz.