JI qarjy salasynda: Qazaqstanda memlekettik aýdıt tsıfrly transformatsııadan ótip jatyr
ASTANA. KAZINFORM – Qazaqstanda memlekettik aýdıt júıesi aýqymdy tsıfrly transformatsııadan ótip jatyr. Aıtalyq, taıaý arada QR Qarjy mınıstrligi Іshki memlekettik aýdıt komıteti (ІMAK) úlken derekterdi taldaý men mashınalyq oqytý tehnologııalaryna negizdelgen kameraldy baqylaýdyń jańa tsıfrly quraldaryn engizetin bolady.

Qarjy mınıstrligi málimetinshe, bul esep-qısapty tekserý jumystaryn avtomattandyryp, baqylaý is-sharalarynyń dáldigi men tıimdiligin arttyrýǵa, sondaı-aq adam faktory men basqa da syn-qaterdi seıiltýge múmkindik beredi.
Taǵy bir mańyzdy jańalyq – bıýdjet monıtorıngi men profılaktıkalyq baqylaýdyń eskertýdi kózdeıtin rásimderin tolyq tsıfrlandyrý. Tyń tetik memlekettik organdar men vedomstvolyq baǵynyshty uıymdar arasyndaǵy ózara is-qımyldy jedeldetip, ýaqyt shyǵyndaryn azaıtady jáne bıýdjet qarajatyn jumsaýdaǵy ashyqtyqty arttyrady.
Buǵan qosa kásibı ortany keshendi damytýǵa baǵyttalǵan eki mamandandyrylǵan tsıfrly joba qolǵa alyndy.
«Aýdıtordyń biryńǵaı kabıneti» - aqparat júıelerimen jumys isteýdiń tıimdiligi men yńǵaılylyǵyn arttyrýǵa arnalǵan ári barlyq bıznes-protsesti biryńǵaı terezege ıntegratsııalaı otyryp, Іshki memlekettik aýdıt komıteti men onyń aýmaqtyq departamentteriniń tsıfrly basqarý pýnkti bolyp sanalady.
«Aýdıtor qalqany AІ» - aýdıtorlardy qashyqtan oqytýǵa jáne sertıfıkattaýǵa arnalǵan «aqyldy» júıe. Ol úzdiksiz biliktilikti arttyrýdy qamtamasyz etedi jáne memlekettik aýdıt salasyndaǵy kadrlyq áleýetti kúsheıtedi.
Bul bastamalardyń barlyǵy QR Qarjy mınıstri Mádı Takıev bekitken ІMAK-niń qyzmetin tsıfrlandyrý jónindegi Jol kartasynyń bir bóligine aınaldy. Atalǵan qujat 30 is-sharany qamtıdy jáne taldaý áleýetin nyǵaıtýǵa jáne aýdıttiń tsıfrly quraldaryn damytýǵa baǵyttalǵan.
– Tsıfrly transformatsııa sátti ótýi úshin komıtet «Elektrondyq qarjy ortalyǵy» AQ-men arnaıy jumys sessııalaryn ótkizdi. Bul Qarjy mınıstrliginiń aqparat júıelerin ázirleýshilermen úılesimdi jumysty jolǵa qoıyp, bizdiń mindetterdi tsıfrly ınfraqurylym múmkindikterimen birizdendirýge septigin tıgizdi, - dedi Іshki memlekettik aýdıt komıteti tóraǵasynyń orynbasary Murat Orazbaı.
Qabyldanǵan Jol kartasy syn-qaterdi jedel anyqtap, kemshilikterdiń aldyn alýǵa múmkindik beretin memlekettik aýdıttiń tsıfrly ekojúıesin qalyptastyrýǵa oń áser etti.
Aıta keteıik, endi jas sarbazdardyń joǵary oqý oryndaryna túsý protsesi jeńildeı túspek. «Sarbaz 2.0» jobasy aıasynda jasandy ıntellekt elementteri engizilip, keıbir protsester avtomattandyrylady.