JI geologııa salasyndaǵy mamandardy almastyra ala ma
ASTANA. KAZINFORM – Aldaǵy 10-15 jylda JI jer qoınaýyn barlaý sektorynda óte jaqsy kómekshi qural bolady. Biraq báribir de adamnyń ornyn basa almaıdy. Bul jóninde MINEX Kazakhstan forýmynda «Grýppa IGT» kompanııasynyń atqarýshy dırektory Dmıtrıı Agapıtov málimdedi.
Onyń sózinshe, salany tereń meńgerip, kásibı maman bolý úshin qyzmetkerler 12-15 jyl jumys istep, mol tájirıbe jınaýy kerek. Sondyqtan jobalardy JI-ge basybaıly tapsyrý orynsyz.
– Geologııadaǵy jobalarǵa JI-di engizý jáne damytý máselesimen 6 jyldan beri aınalysyp kele jatyrmyz. Ol mamandardy jumyssyz qaldyrady degen pikirdiń marketıngtik daqpyrty basym, - dedi Agapıtov.
Áıtse de, onyń sózinshe, aldaǵy 10-15 jylda jaǵdaı ózgerýi de múmkin.
– Mysaly, Qytaıda avtokólik qurastyratyn keı tsehtarda 2-3 adam jumys isteıdi. Óıtkeni, qurylǵylarǵa avtomattandyrylǵan júıe engizilgen. Al tabıǵatqa mundaı ereje júrmeıdi. Jer qoınaýy ár tusta ár alýan ári kúrdeli. Sondyqtan geologııaǵa JI-di tolyqqandy engizý ázirge múmkin emes. Ol tek iri kólemdegi aqparatty jınap, óńdeýge kómektese alady. Alaıda 10-15 jyldan keıin tehnologııa qalaı damıtynyn kóre jatarmyz, - dedi Agapıtov.
Sonymen birge, qazir geologııada JI-ge tıisti nusqaýlyqtar berip, jumysyn tekserip, qajet bolsa, túzetip otyrý qajet.
Aıta keteıik, buǵan deıin atalǵan forýmda metaldardy qaıta óńdeý máselesi talqylanǵanyn jazǵanbyz.
