JI energetıkalyq básekeniń aldyńǵy shebine shyqty
ASTANA. KAZINFORM – Aldaǵy jahandyq energetıkalyq báseke tek munaı men gaz úshin ǵana emes, jasandy ıntellektini (JI) birinshi bolyp kim damytatynymen aıqyndalady. Bul jarysta AQSh jeńiske jetýi tıis. Mundaı pikirdi American Petroleum Institute prezıdenti Maık Sommers aıtty, dep habarlaıdy FOX Business.
Maık Sommerstiń aıtýynsha, jasandy ıntellektiniń qarqyndy damýy elektr energııasyna degen suranysty kúrt arttyryp otyr. Osy sebepti energetıkalyq ınfraqurylym AQSh ekonomıkasy men ulttyq qaýipsizdigi úshin sheshýshi faktorǵa aınalyp keledi.
Ol Donald Tramp ákimshiligi 2025 jyly energetıka salasyndaǵy maqsattarynyń shamamen 90 paıyzyna qol jetkizgenin atap ótti. Alaıda kelesi strategııalyq kezeń jasandy ıntellektimen tikeleı baılanysty. AQSh tek eń jyldam ári tıimdi JI jasaý jarysynda ǵana emes, onyń energetıka salasyndaǵy múmkindikterin jańa deńgeıde paıdalanýda da alda bolýy qajet.
Sommerstiń aıtýynsha, aldaǵy 15 jylda energııaǵa degen jalpy suranys shamamen 50 paıyzǵa ósedi. Bul barlyq energııa kózderiniń mańyzy arta túsetinin bildiredi. Degenmen ol tabıǵı gazǵa erekshe nazar aýdardy.
Onyń sózinshe, tabıǵı gaz qazirgi amerıkalyq elektr energetıkasy men energojúıesiniń negizi bolyp qala beredi jáne JI dáýirinde bul resýrsqa suranys odan ári kúsheıedi.
– Biz bolashaqta barlyq energııa kózderine muqtaj bolamyz. Biraq eń aldymen tabıǵı gaz qajet. Sebebi ol senimdi, aýqymdy jáne zamanaýı energetıkalyq júıeniń tiregi, – dedi API basshysy.
Sommers AQSh-tyń JI dáýirine tolyqqandy ótýi úshin aýqymdy energetıkalyq jáne tehnologııalyq ınfraqurylym qurýy qajet ekenin atap ótti.
– Biz jasandy ıntellekt úshin kúreste jeńýimiz kerek. Biraq energııa úshin kúreste jeńilsek, JI jarysyn bastaýǵa da qaýqarymyz jetpeıdi, – dedi ol.
Sarapshynyń aıtýynsha, qazirgi bar tehnologııalarǵa qaramastan, munaı men gaz qorynyń shamamen 80 paıyzy áli de jer qoınaýynda ıgerilmeı jatyr. Osyǵan baılanysty energetıkalyq kompanııalar jasandy ıntellektini geologııalyq barlaý, derekterdi taldaý jáne jer qoınaýyn tıimdi zertteý úshin keńinen qoldaný joldaryn izdestirip otyr.
Onyń pikirinshe, JI energetıka salasynda barlaý tıimdiligin arttyryp qana qoımaı, shyǵyndy azaıtyp, ekologııalyq táýekelderdi tómendetýge múmkindik beredi.
Maık Sommers bul úderisterdi júzege asyrý úshin júıeli reformalar qajet ekenin aıtty. Onyń aıtýynsha, jasandy ıntellektini qoldaıtyn ınfraqurylym qurý – bolashaqta AQSh-tyń energetıkalyq qaýipsizdigin qamtamasyz etýdiń negizgi tetikteriniń biri.
Aıta keteıik, buǵan deıin Beıjiń eki jyl ishinde JI-dyń álemdik astanasyna aınalýǵa nıetti ekeni habarlanǵan bolatyn.