JI-diń áseri: elde 400 myńǵa deıin jumys orny qysqarýy múmkin
ASTANA. KAZINFORM – Jasandy ıntellektini jappaı engizý Qazaqstanda 300-400 myń jumys ornyn qysqartýǵa ákelýi múmkin. Bul týraly QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev málim etti.
Onyń aıtýynsha, qazirgi ýaqytta JI-diń eńbek naryǵyna áseri máselesin Eńbek resýrstaryn damytý ortalyǵy zerttep jatyr.
— Olardyń málimetinshe, aldaǵy 10 jylda, ıaǵnı jasandy ıntellekt jappaı engizilse, biraz jumys oryny qysqarýy múmkin. Bul rette kómekshi qyzmetkerlerge, býhgalterlerge, zańgerlerge, sondaı-aq adamnyń jeke aralasýyn qajet etpeıtin ózge de mamandyqtarǵa qatysty bolýy yqtımal. Bul salalar boıynsha ortalyq shamamen 300-400 myń jumys ornyn sanady, - dedi E.Tuıaqbaev Senattyń jalpy otyrysynan keıin tilshiler suraǵyna jaýap bere otyryp.
Vıtse-mınıstr vedomstvo qazirdiń ózinde ózgeristerge daıyndalyp jatqanyn jáne kadrlardy qaıta daıarlaý baǵdarlamalaryn júzege asyryp jatqanyn atap ótti.
— Jyl basynan beri 186 myń adamdy basqa mamandyqtarǵa qaıta oqyttyq. Bul tájirıbe barlyq óńirde bir mezgilde iske asyp jatyr. Astanada «JOLTAP» dep atalatyn shaǵyn sary býtıkter bar, oǵan kez kelgen adam bara alady. Qaıta oqytýdan ótip, ózine laıyq jumys taba alady, - dedi ol.
Eske salsaq, jyl basynda Eńbek jáne halyqty áleýmettik qorǵaý mınıstrligi aldaǵy ýaqytta jasandy ıntellekt elimizde qaı mamandyqtarǵa erekshe áser etetini jaıynda túsinik berdi.
