JI-diń álem ekonomıkasyna qosatyn úlesi 10 trıllıon dollardan asýy yqtımal - Prezıdent

Bul týraly búgin Eýrazııalyq ekonomıkalyq odaqqa múshe memleket basshylaryna jasaǵan úndeýinde Memleket basshysy Qasym-Jomart Toqaev málim etti, dep habarlaıdy Aqordanyń baspasóz qyzmeti.

Prezıdent Úndeýinde álemde buryn-sońdy bolmaǵan múmkindikterge jol ashatyn tarıhı dáýir bastalǵanyn aıtty. Alaıda tehnologııalyq teńsizdiktiń artýymen birge jańa qaterler de paıda bolady.

- Bizdiń mindetimiz – jańa tehnologııalardy halyqtarymyzdyń ıgiligine baǵyttap, eýrazııalyq ekonomıkalyq ıntegratsııanyń basty faktoryna aınaldyrý. Qazirdiń ózinde jasandy ıntellekt tehnologııalary saýda aǵynyn boljaýǵa qatysty máselelerdi oń sheship, kedendik túsimder men saýda kelisimderiniń memleket ekonomıkasyn órkendetýge yqpalyn dál baǵalaı alady, - dedi Memleket basshysy.

Sondaı-aq Prezıdent Qazaqstan Respýblıkasy aldaǵy ýaqytta tolyq tsıfrlyq memleketke aınalý jóninde strategııalyq maqsat qoıyp otyrǵanyn atap ótti. Astanadaǵy Alem.ai ortalyǵy, Alataýdaǵy CryptoCity pılottyq aýmaǵy sekildi memlekettik bastamalar tsıfrlyq ekojúıeni belsendi damytýǵa daıyn ekenimizdi kórsetedi.

Qazaqstan EAEO aıasyndaǵy seriktesterimen jasandy ıntellekt, tsıfrlyq retteý jáne ekonomıkany transformatsııalaý salalarynda bilim men tájirıbe almasýǵa ázir. Birlesken kúsh-jiger arqyly tehnologııalyq jańashyldyqtarǵa ońaı beıimdele alamyz.

- 2026 jyly Astanada ótetin Eýrazııalyq ekonomıkalyq forým alańynda EAEO sheńberinde jasandy ıntellektini jaýapkershilikpen damytý jónindegi birlesken málimdemege qol qoıýdy usynamyz. Atalǵan qujat elderimizdiń tsıfrlyq transformatsııa salasyndaǵy yntymaqtastyǵynyń jańa baǵytyn aıqyndaıdy, - dedi Qasym-Jomart Toqaev. 

Aıta keteıik, osyǵan deıin Prezıdent EAEO-ǵa múshe memleket basshylaryna Úndeý jasady.